Në momentet me decizive të Maqedonisë, ku priten të votohen ndryshimet kushtetuese, i gjallë nga hotelet e Budapeshtit është bërë ish kryeministri dhe kryetari i nderit të VMRO-DPMNE, Nikola Gruevski.
“Shumica e popullit nuk pajtohet me këtë marrëveshje, gjë që u pa edhe në rezultatin e referendumit. Por, pushteti marionetë është i vendosur të shkojë kundër vullnetit të tij, me çdo kusht dhe ta vendosë secilin në burg, ta dëbojë ose likuidojë atë që i pengon në rrugën e tij. Populli del dhe proteston, por tashmë vendimi është në duart e deputetëve. Të atyre 79, 80 ose 81 deputetë”, shkroi Gruevski në profilin e tij në Fejsbuk.
I menjëhershëm ka qenë reagimi i partisë në pushtet LSDM, duke e quajtur Gruevskin antiperëndimor dhe se “nuk ka pasur të keqe më të madhe për Maqedoninë dhe qytetarëve të saj se sa qeverisja kriminale e Nikolla Gruevskit.”
Interesante se ndaj deklaratave të Gruevskit ka reaguar edhe ish ministrja e tij e brendshme, Gordana Jankullovska.
” Kur je larg problemeve, në 800 km nga Maqedonia është e lehtë në rrjetet sociale të thuash çfarë është e lehtë e çfarë jo, pastaj duke u amnistuar nga të gjitha vendimet problematike ku gjithmonë përgjegjës është dikush tjetër dhe duke e injoruar realitetin se Maqedonia është aty ku është sot, midis tjerash dhe shanseve të lëshuara në të kaluarën,” ka shkruar Gordana Jankullovska.
