Antibiotikët u jepen shumicës së pacientëve të shtruar në spitale me infeksione akute virale për të parandaluar infeksione shtesë bakteriale, por kjo praktikë mund të mos rrisë shanset për mbijetesë, sugjeron një studim i ri.
Shkencëtarët hetuan efektin e përdorimit të antibiotikëve në mbijetesë në më shumë se 2,100 pacientë të spitaleve norvegjeze midis 2017 dhe 2021 dhe zbuluan se dhënia e antibiotikëve njerëzve me infeksionet më të zakonshme të frymëmarrjes ndoshta nuk ul rrezikun e vdekjes brenda 30 ditëve, përcjell Fol Drejt.
Në kulmin e pandemisë, antibiotikët janë përshkruar për rreth 70 për qind të pacientëve me Covid-19 në disa vende, të cilat mund të kenë kontribuar në shfaqjen e patogjenëve rezistent ndaj antibiotikëve.
Të dhënat e reja, të cilat ende nuk janë botuar në një revistë mjekësore, sugjerojnë se ka “mbipërdorim masiv të antibiotikëve”, tha autori kryesor i studimit Magrit Jarlsdatter Hovind nga Universiteti i Oslos.
Përdorimi i tepërt i antibiotikëve ka ndihmuar që mikroorganizmat të bëhen rezistent ndaj shumë procedurave mjekësore, të cilat shkencëtarët i konsiderojnë si një nga kërcënimet më të mëdha për shëndetin global.
Hulumtimi iu referua pacientëve që rezultuan pozitivë për infeksione virale si gripi, virusi sincicial i frymëmarrjes ose covid-19, ndërsa ata me infeksione bakteriale u përjashtuan nga analiza.
Në total, 63 për qind e 2111 pacientëve morën antibiotikë për infeksionet e frymëmarrjes gjatë trajtimit të tyre spitalor dhe 168 vdiqën brenda 30 ditëve, nga të cilët vetëm 22 nuk përdorën antibiotikë.
Studiuesit zbuluan se atyre që u ishin dhënë antibiotikë gjatë qëndrimit në spital kishin dy herë më shumë gjasa të vdisnin brenda 30 ditëve sesa ata që nuk merrnin antibiotikë.
“Mjekët duhet të guxojnë të mos japin antibiotikë, në vend që të japin antibiotikë për çdo rast”, tha Hovind.
Duke pasur parasysh kufizimet e një studimi retrospektiv si ky, një provë klinike, të cilën Hovind dhe kolegët e saj e filluan së fundmi, nevojitet për të përcaktuar saktësisht nëse antibiotikët duhet t’u jepen pacientëve të shtruar në spital me infeksionet më të zakonshme të frymëmarrjes, shtoi ajo./FolDrejt/
