Pas disa ditë negociatash, banka më e madhe zvicerane UBS bleu Credit Suisse pasi u pranua një ofertë në vlerë prej më shumë se dy miliardë dollarësh, shkruan Klix, përcjell Fol Drejt.
Marrëveshja e aksioneve ndërmjet bankave zvicerane do të shpallet deri në mesnatë.
“UBS do të paguajë më shumë se 0.50 franga për aksion, shumë më poshtë se çmimi i mbylljes prej 1.86 frangash të premten. Banka Kombëtare Zvicerane ka rënë dakord të ofrojë një lehtësi likuiditeti prej 100 miliardë dollarësh për Credit Suisse si pjesë e marrëveshjes”, shkruan Financial Times.
Gjithashtu, gazeta britanike raportoi se UBS ra dakord të zbusë klauzolën për ndryshime të rëndësishme negative, të cilat do të anulonin marrëveshjet nëse do të kishte një rritje të rrezikut të kredisë.
Edhe më herët zyrtarët zviceranë theksuan se do të ndryshonin ligjin që do të anashkalonte votën e aksionerëve për çështjen e blerjes dhe shitjes së bankës në funksion të krizës në të cilën ndodhet Credit Suisse. Një vendim i tillë shkaktoi indinjatën e madhe të aksionarëve të cilët deklaruan se kjo mënyrë e blerjes dhe shitjes është shembull i biznesit negativ të korporatës.
“Nuk mund të besoj se anëtarët dhe aksionarët tanë do të jenë të lumtur për këtë. Nuk kam parë kurrë të merren masa të tilla. Kjo tregon se sa e keqe është situata,” tha CEO i Fondacionit Ethos Vincent Kaufmann, i cili përfaqëson fondet zvicerane të pensioneve që zotërojnë midis tre dhe pesë për qind të aksioneve në të dyja bankat.
Pas mbylljes së dy bankave të rëndësishme në sektorin e teknologjisë në Amerikë në ditët e fundit, Credit Suisse njoftoi se është gjithashtu në një situatë të vështirë financiare dhe se duhet të shpëtohet urgjentisht banka.
Duke qenë se kjo bankë zvicerane është jashtëzakonisht e rëndësishme për të gjithë tregun evropian, Banka Kombëtare e Zvicrës pranoi të lëshonte një kredi prej 40 miliardë dollarësh, e cila duhej të siguronte shpëtimin e bankës. Mirëpo, kjo masë nuk mjaftoi dhe ditët e fundit u organizuan negociata për shitjen e kësaj banke tek UBS, e cila përfundimisht u realizua. /FolDrejt/
