Fikret Zendeli (35) ka arritur të krijojë me sukses një firmë, që ai e kishte menduar prej kohësh: një zyrë për ndërtime inxhinierike. Si shef i saj, ai përpunon projekte të ndryshme urbanistike.
“Si biznesmen unë kam një përgjegjësi të madhe sociale,” thotë 35 vjeçari për magazinën më të madhe të Europës, “Der Spiegel”. “Nëse e marrim kështu unë mund të blej një jaht, por si mund të ndodhte kjo, kur punëtorëve dhe fqinjëve të mi u shkon keq?”
Në një natë dhjetori 2009 me babain e tij ai mori rrugën nga Cyrihu drejt Shkupit me shqetësimin për situatën e bashkëqytetarëve të tij. Sot, nëntë vjet më vonë ai është ndër biznesmenët më të suksesshëm të Shkupit, përcjell foldrejt.com. Ai udhëheq me firmën për planifikim ndërtimor dhe konstrukcione, ka punësuar dhjetë punëtorë dhe i takon pak personave në rajon që ofron teknikën e re tredimensionale (BIM).
Por pavarësisht kësaj, Zendeli nuk njihet për suksesin në biznesin e tij, sa njihet për angazhimin shoqëror. “Social Friday” ka shkaktuar një trazim.
Rezyme e shkurtër e historikut dhe punës së tij
Zendeli është lindur në Gostivar të Maqedonisë. Babai i tij e la shkollën pas tetë vitesh dhe u zhvendos fillimisht në Gjermani, kurse më pas në Zvicër – ku punonte si moler. Nga frika e luftës në Jugosllavi, ai solli bashkëshorten dhe tre fëmijët në 1992 drejt Zvicrës. Në vendin helvet jetuan në Langnau am Albis, në afërsi të Cyrihut. Ai studioi teknikën e ndërtimit në Cyrih dhe për këtë i është tepër falenderues Zvicrës. Edhepse kishte mundësi punësimi në Zvicër, ai deshte të krijojë diçka për të mirën e vendlindjes.
Sot punëtorët në firmën e tij marrin sa dyfishi i mesatares së rrogës në Maqedoni dhe punojnë 40 orë në javë.
Me iniciativën “Social Friday” ai me punëtorët e tij mbjellin pemë, përgatisin ushqim për familjet pa çati mbi kokë, poashtu grumbullojnë veshmbathje për familjet në nevojë. Për punëtorët e Breon edhe kjo kohë paguhet, kurse pjesëmarrja e punëtorëve është me vullnet të lirë – kurse deri tani kanë marrë pjesë thuajse të gjithë, përcjell foldrejt.com.
“Të bësh vepra disi sociale është një ndjenjë e mirë dhe të ndryshon perspektivën. Në firmë neve na ka sjellë bashkëpunim më të frytshëm dhe përmirësim të klimës së punës,” vijon Zendeli, duke shtuar se në të ardhmen do fokusohet në një ose dy projekte sociale, përcjell foldrejt.com.
Qëllimi i humanistit shqiptar është që të bind edhe biznesmenët tjerë të bëjnë të njëjtët gjë dhe ka krijuar një uebfaqe socialfriday.org ku i tregon gjithë aktivitetet e tij. Sukseset e para vetëm kanë ardhur, ku firma letoneze e kozmetikës Oriflame nga gushti ka filluar me Social Friday të parë, kurse interes kanë shfaqur edhe firma nga Kosova, Zvicra dhe nga Portugalia.
Prej nga gjithë ky humanitet? Zendeli sqaron: “Nëse shtëpia e fqinjëve të mi digjet, duhet të ndërhyj, pasi në rast të kundërt do digjem edhe unë. Uroj që shumë biznesmenë ta konceptojnë këtë.”/Foldrejt.com
