Deklaratat e pabazuara të Iranit, që shënjestrojnë Turqinë dhe presidentin turk janë të papranueshme, tha sot ministri i Punëve të Jashtme të Turqisë, Mevlüt Çavuşoğlu, raporton Anadolu Agency (AA).
Sipas burimeve diplomatike, kryediplomati turk Çavuşoğlu zhvilloi një bisedë telefonike me homologun e tij iranian Mohammad Javad Zarif, ku ai hodhi poshtë deklaratat e pabaza në lidhje me Turqinë dhe presidentin turk Recep Tayyip Erdoğan.
Burimet, që kërkojnë të mbesin anonime për shkak të kufizimeve për t’u prononcuar për mediat, thanë se gjatë bisedës, u diskutua qëndrimi i palës iraniane mbi poezinë, duke vënë në dukje se Çavuşoğlu tha poezia që Erdoğan lexoi në fjalimin e tij në Baku ishte rreth Malësisë së Karabagut dhe se presidenti gjatë fjalës së tij nuk përmendi Iranin, madje as në mënyrë implicite.
Sipas burimeve, Çavuşoğlu theksoi se përderisa kanalet ishin të hapura për t’ia përcjellë Turqisë pikëpamjet mbi këtë çështje, deklaratat e pabazuara dhe të rënda të Iranit që shënjestrojnë presidentin turk ishin “të papranueshme”.
Duke kujtuar mbështetjen e Turqisë për vendin gjatë periudhave më të vështira kur të gjithë i kthyen shpinën Iranit, Çavuşoğlu tha se lënia në harresë e këtij fakti rriti zhgënjimin për deklaratat e pabazuara të Iranit.
Gjatë ditës së djeshme, Irani thirri ambasadorin e Turqisë në Teheran, Derya Örs, në lidhje me një poezi që presidenti Erdoğan lexoi gjatë një ceremonie në Azerbajxhan.
Ambasadori Derya Örs u thirr nga zv/ministri i Jashtëm iranian për t’ia kumtuar “dënimin e ashpër” të Teheranit, tha zëdhënësi i Ministrisë së Jashtme, Saeed Khatibzadeh, në një deklaratë me shkrim.
Në deklaratë thuhet se ambasadorit Örs gjithashtu iu tha se Irani urgjentisht pret një shpjegim.
Pas kësaj, Turqia thirri ambasadorin iranian rreth akuzave të pabaza të bëra në lidhje me presidentin turk.
Ndërkohë, kryediplomati iranian Mohammad Javad Zarif në Twitter u shpreh se poema që Erdoğan lexoi shënjestron integritetin territorial të Iranit.
Presidenti Erdoğan të enjten mori pjesë në paradën e fitores në kryeqytetin e Azerbajxhanit, Baku, për të shënuar suksesin e fundit ushtarak të vendit në çlirimin e Malësisë së Karabakut dhe rajoneve fqinje që gati 30 vjet ishin nën okupimin armen.
