Organizata për Ushqim dhe Bujqësi(Food and Agriculture Organization – FAO) është njëra ndër agjencitë e specializuara të Organizatës së Kombeve të Bashkuara që është e angazhuar me aktivitete nga fusha e bujqësisë. Qëllimi kryesor i kësaj organizate është që të mposht urinë në nivel ndërkombëtar. Duke luajtur një rol të dyfisht, FAO është në shërbim të vendeve të zhvilluara dhe atyre në zhvillim. Vendeve në zhvillim dhe vendeve që janë në fazën e tranzicionit FAO u ofron ndihmë për të modernizuar dhe përmisuar aktivitetet të cilat ndërlidhen me bujqësinë, pylltarinë dhe praktikat e peshkimit, si dhe për të siguruar ushqim të mjaftueshëm dhe të mirë në gjithë botën. Oganizatën për Ushqim dhe Bujqësi shkurtimisht do ta kishim definuar si një forum ku të gjitha shtetet janë të barabarta dhe negociojnë për të arritur marrëveshje si dhe debatojnë rreth politikave të cilat duhet zbatuar në fushën e Bujqësisë dhe Ushqimit në nivel ndërkombëtar.
Në vitin 1943 në Virginia të SHBA-së u takuan qeveritë e 44 vendeve dhe u angazhuan për themelimin e një organizate të përhershme e cila do të merrej me aktivitete nga lëmia e bujqësisë dhe sigurimit të ushqimit në mbarë botën. FAO u themelua në 16 tetor të vitit 1945 në Kjubek Siti të Kanadës dhe nisi punën si agjencion i specializuar i Organizatës së Kombeve të Bashkuara.
Viti 2005 shënoi edhe 50 vjetorin e themelimit të FAO-s me një ceremoni solemne ku morrën pjesë krerët e shteteve dhe qeverive, ministrat dhe personalitete të tjera nga të githa rajonet e botës.Në po të njëjtin vit rizgjedhet Drejtori i Përgjithshëm Jacques Diouf në mandatin e tretë gjashtë vjeçar. Gjithashtu në Konferencën e FAO-s u miratuan reforma plotësuese, duke përfshirë edhe decentralizimin e mëtutjejshëm të personelit të organizatës. Një vit më vonë pëfaqësuesit e 96 vendeve anëtare të FAO-s, në Konferencën Ndërkombëtare mbi Reformën Agrare dhe Zhvillimin Rural të mbajtur në Brazil, me një deklaratë të përbashkët u njoh roli i reformës agrare dhe zhvillimit rural për një zhvillim të qëndrueshëm dhe stabil. Në Qendrën për Menaxhimin e Krizës u zbulua një teknologji e lartë për të luftuar gripin e shpendëve dhe kafshëve të tjera dhe për sigurimin emergjent të ushqimit. Shërbimi i Qendrës monitoron paraqitjen eventuale të ndonjë sëmundjeje dhe i lajmëron ekspertët për çdo rast emergjent brenda 48 orëve.
Misioni i FAO -s mund të definohet nga vetë emri i organizatës. Qëllimi kryesor i saj është arritja e sigurisë së ushqimit në nivel ndërkombëtar dhe në qendër të përpjekjeve është që tju sigurojë njerëzve të kenë qasje në ushqim të mjaftueshëm të cilësisë së lartë dhe me këtë për të çuar një jetë aktive dhe të shëndetshme. Objektivat e FAO-s janë të lidhura ngushtë me misionin e saj:
- Të rrisë standartin e të ushqyerit;
- Të përmisojë produktivitetin bujqësor;
- Të përmisojë jetën e popullsisë rurale; dhe
- Të kontribojë në rritjen e ekonomisë botërore.
Funksionet që ka Organizata për Ushqim dhe Bujqësi janë të rregulluara me nenin 1 të Kartës së Organizatës. Kështu funskioni i parë që ka FAO është :“ duhet të grumbullon, analizon, interpreton dhe shpërndan informacionet në lidhje me të ushqyerit, ushqimin dhe bujqësinë. Sipas Kartës termi “bujqësi” dhe derivatet përfshijnë peshkimin, produktet detare, pylltarinë dhe produktet primare të cilat përfitohen nga pylltaria”.
Organizata për Ushqim dhe Bujqësi duhet që të promovojë, dhe në momentet e duhura të rekomandojë aksione kombëtare dhe ndërkombëtare në lidhje me :
- kërkimet shkencore, teknologjike, sociale dhe ekonomike në fushën e të ushqyerit, ushqimit dhe të bujqësisë;
- përmisimin e edukimit dhe administrimit lidhur me të ushqyerit, ushqimin dhe bujqësinë, si dhe shpërndarjen e njohurive dhe praktikave të të ushqyerit dhe bujqësisë;
- ruajtjen e burimeve natyrore dhe miratimin e metodave të reja në fushën e bujqësisë;
- përmisimin e standartit në përpunimin, marketingun dhe shpërndarjen e produkteve ushqimore dhe bujqësore;
- miratimin e politikave për marrjen e kredive kombëtare dhe ndërkombëtare; si dhe
- miratimin e politikave ndërkombëtare të cilat janë në pajtueshmëri me marrëveshjet për produkte bujqësore.
