Deputetët në Maqedoni mbështetën të premten një propozim historik për të ndryshuar kushtetutën, duke lejuar vendin të ndryshojë emrin dhe të anëtarësohet në NATO, shkruan Associated Press.
Seanca parlamentare zgjati më tepër se 10 orë në një atmosferë konfrontimi të nxehtë mes palëve pjesëmarrëse. Parlamenti përfundimisht votoi në favor të propozimit – një hap kyç në pranimin e marrëveshjes së arritur me Greqinë fqinje në qershor të këtij viti, përcjell Foldrejt.com.
Qeveria socialdemokrate e kryeministrit Zoran Zaev u përpoq të nxiste mbështetjen e anëtarëve konservatorë të opozitës, vota të cilat ishin të nevojshme për të arritur shumicën e dy të tretave që kërkohen në shtëpinë ligjëvënëse prej gjithësejt 120 vende.
“Sëbashku sot kemi shkruar historinë,” tha Zaev. “Udhëtimi ynë drejt një të ardhme më të mirë, drejt anëtarësimit në Bashkimin Evropian dhe në NATO, sapo ka filluar… Ne do të përpiqemi për pajtim dhe unitet kombëtar.”
Me mbështetjen e fortë nga udhëheqësit perëndimor, Zaev po udhëheq një fushatë për të riemërtuar vendin e Maqedonisë Veriore, duke zgjidhur një mosmarrëveshje të gjatë me Greqinë, hap që do ti lejojë vendit të bashkohet në NATO.
Zyrtari më i lartë i BE-së, Donald Dusk, presidenti i Këshillit Evropian, u përgjigj: “Me një zë, ju jeni një hap të madh më afër marrjes së vendit tuaj legjitim në komunitetin tonë transatlanik”.
Konservatorët në Maqedoni kundërshtojnë vrullshëm ndryshimin e emrit dhe bojkotuan një referendum muajin e kaluar mbi këtë çështje.
Igor Janushev, sekretari i përgjithshëm i partisë opozitare VMRO-DPMNE, tha se deputetët konservatorë kishin kaluar një fushatë “kërcënimi politik” përpara votimit dhe pohuan se 3 deputetëve u ishte ofruar ryshfet prej 250,000 deri në 2 milionë euro.
Qeveria refuzoi akuzat dhe tha se do të reagonte me veprime ligjore.
Pas votimit të së premtes, proçesi i ndryshimit të kushtetutës duhet të fillojë zyrtarisht brenda dy javëve të ardhshme.
Zaevi do të ishte detyruar të thërriste zgjedhje të parakohshme nëse qeveria nuk do të kishte grumbulluar votat e nevojshme.
Ndryshimi i emrit do të përfundojë një mosmarrëveshje 27 vjeçare me Greqinë, e cila pretendon se emri aktual i shtetit fqinj të saj nënkupton pretendime në krahinën e vet të Maqedonisë dhe në trashëgiminë e lashtë greke.
Athina ka thënë se do të bllokojë pranimin e Maqedonisë në NATO dhe në Bashkimin Evropian nëse nuk fillon që të realizojë ndryshimet kushtetuese. Zyrtarët perëndimor mbështesin fuqimisht marrëveshjen, e cila do të reduktojë ndikimin rus në Ballkan.
Pas votimit, kryeministri grek Alexis Tsiprac citoi në gjuhën angleze: ““Urime për mikun tim Zoran Zaev!” Vota e mbrëmshme është një hap i madh drejt suksesit tonë të përbashkët. Një hap shumë i rëndësishëm për një të ardhme paqësore dhe të begatë për popullin tonë!”
