Ministri i jashtëm maqedonas Nikola Dimitrov ka kërkuar nga NATO të përmirësojë marrëdhëniet me Rusinë. “Në planin afatgjatë ne duhet ti tejkalojmë marrëdhëniet e tensionuara mes Rusisë dhe Perëndimit dhe përsëri të bashkëpunojmë ngushtë me Rusinë,” tha Dimitrov për konservatoren gjermane “Die Welt”, njofton ekskluzivisht në shqip foldrejt.com. “Natyrisht, që parakushti duhet të jetë të respektohet integriteti territorial dhe të ketë paqe në Ukrainë. Ne europianët kemi nevojë për marrëdhëniet më të mira afatgjate me Rusinë.”
Sa i takon anëtarësimit në NATO, numri një i diplomacisë maqedonase shtoi se nuk bëhet fjalë për “ose me këtë ose kundër atij” dhe se “anëtarësimi në NATO nuk do të thotë të jesh përjetësisht kundër Rusisë.”
Rreth integrimit në BE, Dimitrov shtoi se është jetike për stabilitetin dhe paqen në Ballkan që bisedimet për Maqedoninë të hapen në qershor 2019, përcjell foldrejt.com.
“Ne jemi një ishull në qendër të BE. Vala e refugjatëve ka treguar, sesa i rëndësishëm është rajoni për sigurinë e Europës.”
Megjithatë Dimitrov përsëriti edhe njëherë se Maqedonia do kundërshtojë hapjen e një qendre azilpranuesish.
Në fund Dimitrov tha se marrëveshja me Greqinë ishte më e mira e mundshme dhe se ndërtimi i statujave të Aleksandrit të Madh nga qeveria e kaluar me “tendenca autokratike” ishe si pasojë e presionit të mosbesimit dhe dyshimit dhe jo nga ndjenja e identitetit të fortë. “Ne nuk mund ta ndryshojmë historinë, por të ardhmen mundemi,” tha ai./Foldrejt.com
