“Kur kisha më shumë kohë të lirë, gjurmimi nëpër arkiva më ishte kthyer në hobi relaksues. Njëherit, gjeja artikuj të rrallë, të papublikuar më pas dhe tejet të rëndësishëm për historinë bashkëkohore të Kosovës. Ndër të tjera, kisha gjetur edhe këta dy artikuj të rrallë.
I pari, i botuar në “Bujkun” e gushtit 1993, sjellë historinë e bastisjeve në familjet e aktivistëve ilegalë. Policia serbe kishte bastisur edhe familjen e Fazli Veselit për ta kërkuar të birin e tij, 26 vjeçarin Kadri Veseli. Policia ia grisi flamurin kombëtar që mbanin në shtëpi, e arrestoi Fazliun dhe dy djemtë e tjerë të tij, por Kadri Veselin nuk e gjetën.
Artikulli i dytë është i katër viteve më vonë, i korrikut 1997, i botuar poashtu tek “Bujku” dhe raporton mbi procesin gjyqësor që po zhvillohej nga gjykata serbe në Prishtinë. I famshmi grup i Adem Jasharit u dënua në total me 264 vjet burg. Mes të dënuarve figurojnë edhe emrat e Hashim Thaçit 29 vjeç dhe Rexhep Selimit 26 vjeç.
Që të tre këto figura udhëheqëse të UÇK-së dje u arrestuan nga Gjykata Speciale. Nga ajo që doli nga aktakuza ndaj tyre, fatkeqësisht, vërehet se akuzat e vjetra të fabrikuara nga Serbia më 1993 dhe 1997 vetëm janë kopjuar dhe reproduktuar nga Prokurori i Specializuar. Fatkeqësisht, Thaçi, Veseli, Selimi e bashkëluftëtarët e tyre, edhe pas 30 viteve, duhet ta dëshmojnë sërish se lufta e tyre dhe e UÇK-së ka qenë e drejtë dhe se akuzat e Serbisë janë të pavërteta.”- shkruan Fitim Salihu. 
