Është vetëm 16-vjeçare, por deri më tash Enilda Zeqiri i ka vargëzuar më shumë 20 medalje e trofe në kabinetin e saj në garat e atletikës. Atletja lipjanase aktualisht është pjesëmarrëse në kategorinë e seniorëve me klubin e atletikës “Blinaja” në Lipjan, si dhe në klubin e Fushë Kosovës.
Shkruan: Gëzim Olluri
Ndonëse në moshën 16-vjeçare, falë talentit dhe punës së saj, Enilda ka arritur të kategorizohet me grupin e seniorëve në garat e sportit të atletikës. Zeqiri e përfaqëson edhe Republikën e Kosovës dhe i ka radhitur mbi 20 çmime të vendit të parë në garat vendore e ndërkombëtare.
Ajo merr pjesë në dy sporte të ndryshme në garat e atletikës dhe ka arritur të bëhet sportistja e vitit në të dyja kategoritë pjesëmarrëse.
“Unë marrë pjesë në gara të atletikës e gjithashtu edhe me triathlon. Në atletikë garoj në disiplina kryesisht të mesme, ndërsa në triathlon bëjnë pjesë sportet ‘3n1’, ku llogaritet noti, çiklizmi dhe vrapimi. Deri më tani kam arritur rezultate mjaft të mira dhe kam qenë kampione e Kosovës në shumicën e garave, duke u zgjedhur edhe si sportiste e vitit në të dyja sportet”, shprehet Enilda për ‘FolDrejt’.
Përveç aktivizimit në klubin e atletikës “Blinaja”, angazhimin e vazhdon edhe në garën e triathlonit me klubin e Fushë Kosovës, derisa nga ana tjetër është edhe pjesë e Kosovës.
“Aktualisht jam në klubin e atletikës ‘Blinaja’ në Lipjan, ndërsa në triathlon jam në klubin e Fushë Kosovës, ku marrë pjesë në gara të ndryshme te cilat mbahen si brenda, ashtu edhe jashtë Kosovës”.
Sado që ka vështirësi udhëtimi në sportin e atletikës, vullneti dhe mbështetja nga ana morale po e shtyn Enildën drejt rrugëtimeve të reja për sfidat e së ardhmes.
“Vështirësi për t’u marrë me atletikë ka shumë për shkak se duhet t’i kushtojmë shumë kohë, të stërvitemi për t’u përgatitur për pjesëmarrje në gara në mënyrë që të performojmë drejt rezultateve të mira. Sa i përket mbështetjes nga ana financiare, kemi por jo edhe aq të mjaftueshme për këtë sport, megjithëse më mbështet e ndihmon Agjencioni ‘Troshupa’, ndërsa moralisht gjithashtu kam mbështetje të madhe”, shton tutje talentja nga Lipjani.
Atletika për talenten nga Lipjani fillnisjen e ka nga vegjëlia dhe që nga atëherë ka instituar të aktivizohet në gara të ndryshme shkollore e më pas edhe me klube të atletikës në nivel shteti.
“Sportin e kam dashtë prej ku isha e vogël. Mbase nga klasa parafillore kur kam marrë pjesë në kroset e shkollës. Aty kam triumfu gjithmonë dhe kjo ka qenë koha e inspirimit që të vazhdoj e të bëhem anëtare e ndonjë klubi. Nga klasa e gjashtë në orën e edukatës fizike në garat për matje të vrapimeve e kërcimeve, arsimtari i edukatës fizike, Emin Grajqevci, të cilin e falenderojë shumë, ka vërejtë talentin dhe më ka ndihmu me vazhdu me këtë sport, duke më angazhuar në klubin e tij të atletikës ‘Blinaja’ në Lipjan. Nga aty kam vazhduar drejt sukseseve në gara vendore e të huaja”.
Ajo synon suksese kulminante në rrafshin ndërkombëtar në garat e atletikës dhe njëherish të shndërrohet në vajzë model për gjeneratat e reja.
“Ëndrra ime është që të bëhem një sportiste e mirë e të marrë pjesë në çdo garë botërore dhe atje të vendosi rekorde të reja duke u bërë frymëzim për gjeneratat e reja”, thotë Enilda Zeqiri që me talentin e sportistes pritet t’i sjell medalje shtetit të saj.
Ajo së fundi është mirëpritur edhe nga kryetari i Komunës së Lipjanit, Imri Ahmeti, i cili i ka premtuar mbështetje nga ana e institucioneve komunale./FolDrejt/
