Pas takimit të rëndësishëm mes kryeministrit maqedonas Zoran Zaev dhe liderit të Aleancës për Shqiptarët, Ziadin Sela, është marrë vesh për disa ndryshime në Kushtetutën e Maqedonisë që do votohet pas pak ditësh në Kuvendin e Maqedonisë.
Në pikën e parë, në preambulën ku thuhet “qytetarët të cilët jetojnë në kufijtë”, zëvendësohet me formulimin e ri “qytetarët e Maqedonisë, kombit maqedonas dhe pjesë të kombit shqiptar, pjesë të kombit turk, pjesë të kombit vlleh…”.
Amandamenti i dytë i cili pranohet nga Aleanca për Shqiptarët dhe Lëvizje BESA e Bilall Kasamit është diskutimi për amandamentin 36 ose neni 49 ku deri tani thuhej “për diasporën e kombit maqedonas”, kurse tani do jetë “diaspora e kombit maqedonas dhe grupeve tjera etnike të cilat jetojnë në Maqedoni.”
Pjesa e tretë që është arritur në Kushtetutën e Maqedonisë si pasojë e insistimit të ASH, është që Kosova të njihet si shtet fqinj përkrah katër shteteve tjera.
Marrëveshje është arritur edhe për emërtimin rreth përcaktimit të shtetësisë në dokumente, ku tek shqiptarët do të hiqet emërtimi “maqedonas”, ashtu që në dokumentet e tyre të udhëtimit dhe dokumentet e tjera tek pjesa e shtetësisë apo “nacionality” do të shkruaj vetëm “qytetar i Republikës së Maqedonisë së Veriut”. Kjo pikë do të harmonizohet edhe me Lëvizjen BESA, pasi që ka qenë pikë e përbashkët.
Por Sela dhe Zaev nuk janë harmonizuar më fjalinë ku shkruhet për gjuhën shqipe “gjuha që e flasin 20% e popullatës”. Edhe Sela tha se këtë do ta shqyrtojnë në të ardhmen, kurse Zaev tha se edhe ai nuk dëshiron që ndonjë gjuhë të thirret me përqindje por çështja do diskutohet edhe njëherë në të ardhmen – ku thuajse hapja e Kushtetutës është thuajse e pamundur.
Tashmë Sela do votojë ndryshimet Kushtetuese, kurse ju si lexues vetë mund të konfirmoni se sa është arritur progres ndaj të drejtave të shqiptarëve të Maqedonisë./Foldrejt.com
