Nuk ka kaluar akoma java nga varrimi i kryetarit të Komunës së Dibrës dhe njëherit edhe ish myfti i Dibrës për disa dekada radhazi, të ndjerit Ruzhdi Lata, ndërsa në opinion kanë nisur spekulimet se si do rrjedh puna me funksionimin normal të Komunës për tre deri gjashtë muajt e ardhshëm deri në zgjedhjet e parakohshme lokale, gjegjësisht kush do ta zëvendësoj të ndjerin Ruzhdi Lata në këtë periudhë para elektorale.
Foldrejt.com ka arritur të kontaktojë disa nga anëtarët e partive kryesore në Dibër dhe ka arritur të zbulojë kush janë kandidatët POTENCIAL (ose që përfliten) për garën që do ketë një peshë shumë të madhe duke u bazuar në faktin se garat e fundit lokale në Dibër kishin një përplasje shumë të ashpër mes kandidatëve saqë në vend që të tregohet një qytetari kishte akuza të ndërsjellta, ofendime, deri edhe në kallëzime penale.
Në vijim do paraqesim emrat e kandidatëve potencial që aspirojnë të zëvendësojnë kolltukun e të parit të qytetit, duke u bazuar vetëm në spekulimet që kanë marrë jehonë të madhe brenda qytetarëve.
BDI ka tre anëtarë potencialë
Brenda BDI-së bisedohet për tre emra, dy prej të cilët edhe në të kaluarën janë përmendur si potencial por në momentin e fundit janë tërhequr befasisht, i pari është hirurgu i mirënjohur dhe tashmë edhe dekani i Fakultetit të Mjeksisë z. Kastriot Haxhirexha. I dyti është drejtori i Qendrës për Kulturë në Dibër z. Artin Spahiu, ndërsa emri i ri që qarkullon në publik është ai i drejtorit të shkollës së mesme “28 nëntori” z. Ramadan Imeri.
Aleanca për Shqiptarët me katër kandidatë potencialë
Sa i takon Aleancës për Shqiptarët si kandidat potencial përmendet ish kandidati z. Arben Agolli që në zgjedhjet e fundit arriti të kalojë në raundin e dytë me ish kryetarin e ndjerë z. Lata dhe humbi për rreth 300 vota. Emri i dytë i mundshëm prej radhës së Aleancës mund të jetë edhe kardiologu i mirënjohur z. Bekim Pocesta, por duke mos e anashkaluar edhe kryetarin e degës së aleancës dhe profesorin e respektuar të matematikës z. Ilirian Fetahu.
Aleanca për Shqiptarët po diskuton edhe mundësinë e një kandidimi të një gruaje në krye të komunës Dibër.
BESA me tre kandidatë të mundshëm
Nga radhët e Lëvizjes Besa (me kryetar Afrim Gashin), që në zgjedhjet e fundit u renditën të tretët spekulohet se mund të rikandidohet përsëri profesori universitar z. Xhemail Çupi, por si emra potencial përmenden edhe këshilltari komunal dhe inxhinieri softuerik z. Fisnik Mela dhe kryetari i degës së Lëvizjes Besa, juristi z. Lumi Croj.
Gjithçka do zyrtarizohet pas tre muajsh, ku nëse nuk shtyhet tej afateve, KSHZ do caktojë edhe datën e mbajtjes së zgjedhjeve të ardhshme./Foldrejt.com
