Në rajonet lindore në Donbas dhe Luhansk, ka filluar një ofensivë e egër e ushtrisë ruse. Sipas raportimeve të mediave ndërkombëtare, më shumë se 40 qytete po e përjetojnë ferrin, shkruan Fol Drejt.
Deri më tani është konfirmuar vdekja e pesë civilëve dhe shkatërrimi i 38 ndërtesave të banimit, duke përfshirë këtu: një shkollë, një kamp shëndetësor, një qendër argëtimi dhe një stacion hekurudhor, tha Task Forca e Forcave të Përbashkëta të Ukrainës.
“Pushtuesit qëlluan në më shumë se 40 qytete në rajonin Donetsk dhe Luhansk, duke shkatërruar 47 vende civile, përfshirë 38 shtëpi dhe një shkollë. Si rezultat i këtij bombardimi pesë civilë vdiqën dhe 12 u plagosën,” njoftojnë autoritete ukrainase në Facebook, për sulmet e ushtrisë ruse.
Tashmë, Kremlini zyrtar ka shfaqur qëllimin e qartë me këto sulme, çka do të bënte që e tërë provinca e Luhanskut të binte nën kontrollin e tij.
Sipas BBC-së, një figurë e lartë në Ukrainën lindore ka mohuar raportet se një rrugë jetike që lidh zonat e kontrolluara nga ukrainas në lindje është nën kontrollin e forcave ruse.
“Luhansk nuk ka rënë!” Tha kreu i administratës ushtarake të rajonit, Serhiy Haidai.
Luftimet kanë arritur në periferi të qytetit të madh të Severodonetsk, një objektiv kryesor rus.
Nëse kapin rrugën për në Bakhmut, atëherë qyteti mund të rrethohet.
Zoti Haidai tha se ndërsa rruga për në jug-perëndim të Severodonetsk ishte vënë nën zjarr, ndihma humanitare ende po kalonte./FolDrejt/
