Në lidhje me tensionimin e situatës mes Kosovës dhe Serbisë ka reaguar edhe shteti më i madh i Europës, Gjermania, e cila njëherësh është protagonistja që kundërshton ndarjen e Kosovës, shkruan foldrejt.com.
“Ne i bëjmë thirrje qeverisë së Prishtinës që të tërhiqet nga ky vendim,” për tarifën 100 përqind të produkteve serbe dhe boshnjake, thanë nga qeveria gjermane për DW, duke cituar edhe marrëveshjen e tregtisë së lirë CEFTA mes shteteve ballkanike.
Edhe raportuesi i Kosovës në frakcionin CDU/CSU, Peter Beyer, e sheh këtë vendim të tarifës 100 përqind si një sinjal kundër marrëveshjes së stabilizim-asocimit mes BE dhe Kosovës.
“Qeveria e Kosovës duhet ta tërheqë menjëherë këtë vendim,” tha Beyer, përcjell foldrejt.com. Konfliktet tregtare duhet të zgjidhen nga personat përkatës, sa më parë.
Shumë ekspertë theksojnë se banorët e Kosovës janë të lodhur me premtimin e liberalizimit të vizave dhe se kjo mund të jetë baza e gjithë problemeve. Në anën tjetër BE mendon të shtyjë liberalizimin pas zgjedhjeve të përgjithshme europiane maj 2019 – një kohë mjaft e gjatë për Kosovën e cila ka plotësuar të gjitha kriteret.
Raportuesi i Gjelbër për Kosovën në Komitetin e Punëve të Jashtme, Manuel Sarrazin, gjithashtu tha se banorët e Kosovës meritojnë liberalizimin e vizave.
“Kosova ka përmbushur kriteret nga Komisioni i BE. Liberalizimi i vizave nuk është dhuratë për kosovaret dhe kosovarët, por pjesë e një marrëveshjeje, e cila duhet të zbatohet nga BE,” tha ai për intervistën e medias gjermane.
Në të njëjtën kohë ai ftoi Serbinë dhe Kosovën që të përmirësojnë marrëdhëniet dhe se pa “marrëdhënie të mira fqinjësore” asnjëri prej tyre nuk mund të anëtarësohet në BE, tha Sarrazin./Foldrejt.com
