Granit Xhaka ka arritur të fitojë titullin e kampionit në Gjermani me klubin e tij – Bayer Leverkusen. Ky është titulli i parë në histori të klubit për Bayer Leverkusenin. Skuadra e Bayerit e ka siguruar trofeun pas 29 javësh të zhvilluara në kampionatin gjerman.
Shkruan: Gëzim Olluri
Në javën e 29-të në Kampionatin e Gjermanisë, Bayer Leverkuseni mposhti 5-0 Werder Bremenin dhe siguroi edhe zyrtarisht titullin e kampionit duke mbajtur vendin e parë me 79 pikë. Golat e fitores i realizuan Victor Boniface në minutën e 25-të nga penalltia, Granit Xhaka në minutën 60-të dhe Florian Wirtz, i cili realizoi tri herë në minutat 68-të, 83-të dhe 90-të
Nga 29 takime të zhvilluara, Bayeri ka regjistruar 25 fitore, 4 herë ka barazuar dhe nuk ka pësuar asnjë humbje. Faktikisht, në të gjitha garat ku Bayer Leverkuseni merr pjesë këtë sezonë, i liston 43 ndeshja pa asnjë humbje.
Skuadra e drejtuar nga Xabi Alonso në sezonën 2023/2024, ka treguar formë të lartë duke shfaqur lojë të bukur dhe atraktive. Janë 16 futbollistë që e kanë gjetur rrugën e golit dhe 12 renditen në listën e asistuesve, fakt që tregon për kompaktësinë dhe punën ekipore.
Nga 29 takime të zhvilluara, Bayeri është skuadra e vetme që ka siguruar pikë në shtëpi e udhëtim më shumë se çdo skuadër tjetër gjermane. Në më shumë se 22 lojëra përballë kundërshtarëve, skuadra e Xhakës ka arritur të ketë posedimin e topit, më shumë goditje brenda kuadratit të portës e më shumë krosime në drejtim të zonës. Aktualisht kanë pranuar vetëm 19 gola duke u renditur të parët në Gjermani për mbrojtjen më të mirë.
Deri në fund të kampionatit skuadra nga “BayArena” do t’i zhvillojnë edhe pesë sfidat e mbetura. Në vendin e dytë në Gjermani renditet Bayern Mynhen, ndërsa në vendin e tretë janë skuadra e Shtutgartit.
Duhet theksuar që Bayer Leverkusen janë në garë edhe për triumfin në Europa Ligë e gjithashtu do të luajnë edhe në finale të Kupës së Gjermanisë më 25 maj kundër Kaiserslauternit.
/FolDrejt/
