Kryeministri i Kosovës, Ramush Haradinaj në vazhdimin e seancës së Kuvendit të Kosovës ku po debatohet lidhur me dialogun Kosovë-Serbi tha se pajtimi me Serbinë nuk nënkupton edhe faljen e krimeve, por është vendosje e marrëdhënieve bilaterale.
Haradinaj në seancë ka folur edhe për marrëveshjen përfundimtare dhe çështjen e të pagjeturve.
Ai duke folur për dialogun Kosovë-Serbi, tha se pajtimi me Serbinë nuk nënkupton faljen e krimeve të kryera, por vendosjen e marrëdhënieve ndërshtetrore.
“Nga marrja e përgjegjësisë qeverisëse, jemi interesuar për kategoritë që meritojnë kujdes të veçantë, njëkohësisht edhe për temën e të pagjeturve… Pajtimi me Serbinë nuk është falje e krimeve, por është vendosje e marrëdhënieve bilaterale, dhe kjo do të ndihmojë edhe zgjidhjen e çështjes së të pagjeturve”, u shpreh Haradinaj.
Ndryshe, gjatë seancës së Kuvendit të Kosovës, ka folur edhe Andin Hoti.
Hoti kërkoi që në dialogun me Serbinë të bisedohet për fatin e personave të zhdukur gjatë luftës së fundit në Kosovë.
Sipas tij, kjo temë duhet të jetë ndër pikat e para që duhet të diskutohet në nivel presidentësh.
“Kërkoj nga presidenti, nga kryeministri, nga Kuvendi, që ta fusin këtë pikë në bisedimet me Serbinë dhe të jetë njëra nga pikat e para që diskutohet në nivelin e lartë, në nivel presidentësh. Të nderuar udhëheqës, unë dua ta di ku e kam babin, familjet duan të dinë ku i kanë më të dashurit e tyre, kjo nuk guxon të kalojë nën heshtje, dhe nuk e lejoj të kalojë në heshtje, pa këtë nuk e ka kuptim asnjë marrëveshje që do të bëhet me Serbinë”, tha Hoti.
Tutje, i biri i Ukshin Hotit tha se një konsensus me Serbinë do të duhej të pranohej vetëm kur “Serbia të ia kthen Kosovës mbi 16 mijë jetë që i ka marrë”.
