Deputeti nga radhët e Lidhjes Demokratike të Kosovës, Avdullah Hoti, i ka drejtuar kritika kryeministrit të Republikës së Kosovës, Albin Kurti, duke i thënë se thirrja për investim dhe paralajmërimi për konflikt nuk shkojnë bashkë.
“Shkon në Davos dhe e organizon një minikonferencë për investime, për të cilën e paguan një kompani konsulente 58,341.19 franga zvicerane pa asnjë procedurë prokurimi.
Por, në dhomën tjetër, kërkon nja 70 trupa më shumë të KFOR-it nga Finlanda, edhe pse KFOR-i e rrit dhe e zvogëlon numrin e ushtarëve brenda natës sipas nevojës që ka”, ka shkruar Hoti në facebook.
Tutje, Hoti ka shtuar disa pyetje, ndër tjerash se nga do ta shpie Kosovën kjo qasje në fushën e politikës dhe ekonomisë.
“Çfarë mesazhe janë këto dhe çfarë promovimi i investimeve është ky?!
Kush po e këshillon kështu?!
Kah na shpie kjo qasje në fushën e politikës dhe të ekonomisë?!”, është shprehur tutje Hoti./FolDrejt/