I zhytur në zi dhe zemërim, Iraku po varros sot viktimat e bombardimeve – për të cilat fajëson Turqinë – që mori jetën e nëntë civilëve , në një park rekreacioni në Kurdistanin irakian. Një tragjedi që rrit tensionin në marrëdhëniet mes dy vendeve fqinje.
Bagdadi fajësoi forcat e armatosura turke për sulmet, ndërsa Ankaraja mohoi çdo përgjegjësi dhe nga ana e saj fajësoi Partinë e Punëtorëve të Kurdistanit, një organizatë e cilësuar si “terroriste” nga Turqia dhe aleatët e saj perëndimorë, shkruan AA, transmeton Fol Drejt.
Nëntë arkivolet, të mbuluara me flamurin irakian dhe kurora, u fluturuan me avion ushtarak nga Erbili , kryeqyteti.të Kurdistanit të Irakut , në aeroportin e Bagdadit ku i priti kryeministri Mustafa al-Kazimi.
Kryeministri u takua në aeroport me familjet e viktimave. Të afërmit i morën trupat për t’i varrosur . Shumica e funeraleve do të mbahen në qytetin e Naxhafit, siç diktohet nga tradita shiite.
E enjtja ishte një ditë zie kombëtare për Irakun, pas tragjedisë në rajonin Zaho që vrau nëntë persona dhe plagosi 23 të tjerë. Shumica e viktimave ishin turistë nga Iraku jugor ose qendror që përpiqeshin t’i shpëtonin vapës dhe të gjenin pak freski në male. në kufirin me Turqinë.
Bagdadi thirri sot ambasadorin e Turqisë dhe i dorëzoi atij një “letër proteste “, sipas një deklarate. Në këtë tekst “ai i bën thirrje Turqisë që të zgjidhë problemet e saj të brendshme larg kufijve të Irakut dhe pa dëmtuar popullin e saj”.
Mëngjesin e sotëm, pranë një qendre për viza turistike për Turqinë, e cila ishte vënë nën mbrojtjen e policisë, u mblodhën disa dhjetëra protestues dhe kërkuan dëbimin e ambasadorit turk . “Turqisë dhe ambasadës së saj i themi mjaft. Qëndrimi paqësor nuk i shërben asgjë, ne duam të djegim ambasadën , ambasadorin turk të dëbohet. Qeveria jonë nuk po bën asgjë”, tha një 53-vjeçar, Ali Yasin.
Protesta të ngjashme u zhvilluan të mërkurën mbrëma dhe mëngjesin e sotëm në të gjithë vendin, nga Kirkuku në Qerbela dhe Naxhaf. Protestuesit dogjën dhe shkelën flamujt turq, ndërsa portretet e presidentit turk Rexhep Tajip Erdogan kishin të shkruar fjalën “terrorist”./FolDrejt/
