Greqia ka një ligj profitabil për buxhetin e saj. Kush investon në pasuritë e patundshme të saj 250 mijë euro merr pasaportën greke, që automatikisht u mundëson lëvizje të lirë në gjithë zonën Shengen, shkruan “Der Spiegel”, përcjell foldrejt.com.
“Prona e një pasuria të patundshme në Greqi, të hap dyert e hapësirës Shengen” është motoja e programit të vizave në një faqe greke interneti. Kjo faqe u ndihmon jo-europianëve që të investojnë në vendin grek, të marrin një leje-qëndrim, lëvizje të lirë në gjithë Europën dhe marrjen e pasaportës europiane.
“Gjithçka për 250 mijë euro, ku vetëm gjatë vitit të fundit ka pasur 3000 aplikime të tilla, ndërsa në pesë vitet e fundit 8000 sosh. Shumica kinezë dhe rusë,” përcjell albinfo.ch. Pra Greqia vetëm pesë vitet e fundit ka përfituar rreth dy miliardë euro nga shitja e shtetësisë së saj.
Ngjashëm ndodh edhe me Bullgarinë, edhepse kjo e fundit në formë jashtë ligjore. Brenda javës mesatarisht janë shpërndarë 30 pasaporta bullgare për një çmim prej 5000 eurove. Për këtë akuzohen 20 të pandehur. Pasaporta bullgare është bërë ndër më të preferuarat për komunitetin sllav në Ballkanin Perëndimor, por jo vetëm. Gjatë vitit të kaluar janë shpërndarë 115 mijë pasaporta bullgare.
Një sistem për shitjen e pasaportës e kanë edhe vendet tjera europiane si Austria, Belgjika, Malta, Portugalia dhe Qiproja.
Por për dallim që në Greqi me investim njëherë merr lejeqëndrimin dhe vetëm pas shtatë vitesh pasaportën, në Qipro nuk ke barriera të tilla, por vetëm një shumë më të madhe – dy milion euro. Vendi ishullor në Mesdhe përfiton 1 miliardë euro në vit – pasi shumë oligarkë rusë e kanë më lehtë të blejnë pasaportën qipriote.
Ngjashëm vlen edhe për shtetin tjetër ishullor – Malta. Me skemat e ashtuquajtura ‘pasaporta të arta’, investitorët e pasur kanë qenë në gjendje të blejnë vetë shtetësinë e BE nëpërmjet një numri skemash investimesh, ku Malta është një nga më të spikaturat. Sipas programit të investitorëve të Maltës, të krijuar në 2014, manjatët rusë kanë blerë pasaporta të BE për qindra mijëra euro. Nga një listë e njerëzve që kishin fituar shtetësi malteze në 2016, rreth 700 ishin nga Rusia.
Tashmë Komisioni Europian po përpilon një projekt-ligj që do vendosë kushte sesi mund të merret pasaporta europiane. Kjo mund të sjellte reagimin e shteteve që përfitojnë miliona nga shitja e pasaportës.
