Ka disa javë prej kur rruga “Xhorxh Bush” u shndërrua në shesh.
Para disa ditësh gjithashtu u paralajmërua se kjo rrugë do të hapet më 8 të këtij muaji për trafikun urban, taksitë dhe veturat emergjente (policia, zjarrfikësit, auto-ambulancat), po kjo ende nuk ka ndodhur, shkruan Fol Drejt.
Mbyllja e kësaj rruge edhe kur ishte bërë në formë të testimit kishte shkaktuar kolona të gjata dhe komunikacion të dendur.
“Më 8 janar e kemi një plan që kjo rrugë të hapet, të kthehet në qarkullim, sidomos për autobusë, këtë po e them me siguri, dhe pastaj qarkullimi i autobusëve e liron pjesën tjetër”, ishte shprehur nënkryetari i kryeqytetit, Alban Zogaj.
Fol Drejt kontaktoi zyrën për media të Komunës së Prishtinës nga ku drejtori i Shërbimeve Publike, Ilirik Musliu njoftoi se për momentin janë duke u bërë disa punime infrastrukturore dhe nuk dha ndonjë datë të saktë në lidhje me hapjen e kësaj rruge për trafikun urban, taksitë dhe veturat emergjente.
“Rruga “Xhorxh Bush” do të jetë shesh, pas përfundimit të punimeve në infrastrukturë do të jetë e hapur për trafikun urban, taksitë, veturat emergjente (policia, zjarrfikësit, auto-ambulancat), me shpejtësi të kufizuar të qarkullimit”, tha Musliu.
Ndonëse nuk është hapur ende kjo rrugë, shumë qytetarë e kanë mirëpritur vendimin e komunës për lejmimin e autobusëve, taksive dhe veturave emergjente në këtë pjesë, duke theksuar se kjo në radhë parë do të ishte në të mirë të qytetarëve dhe do të shkaktonte më pak tollovi në trafik./ZamiraMehmetaj//FolDrejt/