Kreu i Partisë Demokratike të Kosovës, Memli Krasniqi, ka kritikuar kryeministrin e Kosovës, Albin Kurti, duke e cilësuar si të paskrupullt e mosmirënjohës për shkak të ndalimit të fjalës së kryetarit të Reçakut, Adem Ramadanit.
Sipas Krasniqit, “ndalimi nga ana e Qeverisë i fjalës së Kryetarit të Reçakut, ish-luftëtarit të UÇK-së, Adem Ramadani, në Akademinë Përkujtimore për 24 vjetorin e Masakrës së Reçakut, vetëm pse ai do të përmendtte Hashim Thaçin e Kadri Veselin në fjalim, fatkeqësisht, është në vazhdën e sulmeve të njëpasnjëshme që ky kryeministër po u bën vlerave të luftës çlirimtare dhe veteranëve tanë”.
Krasniqi ka cilësuar se mund të konsiderohet si gabim kur diçka ndodh vetëm një herë, mirëpo kur përsëritet në vazhdimësi, ai e ka cilësuar si politikë të paramenduar qeveritare.
Krasniqi ka kritikuar kryeministrin Kurti edhe për vlerësimin që i bëri Oliver Ivanoviqit në pesë vjetorin e vrasjes së tij, dje.
“Ndërsa, si për ironi e pa fije turpi, Albin Kurti fjalë të mira dhe elozhe dje thuri vetëm për Oliver Ivanoviqin – të cilin sa ai ishte gjallë, edhe vet e akuzonte për vrasjen dhe dëbimin e shqiptarëve në Mitrovicë gjatë periudhës së luftës. E pas luftës, Ivanoviqi i dashur i Albinit, ka qenë shefi i “Rojave të Urës” që me dhunë e terror e kanë mbajtur të ndarë qytetin e Mitrovicës.
E kuptoj deri diku xhelozinë historike të një veterani të rrejshëm si Albin Kurti, por, nënçmimi i veteranëve të Ushtrisë Çlirimtare të Kosovës nuk do të kaloj asnjëherë para nesh dhe qytetarëve të Kosovës.
Turp!”, ka thënë Krasniqi./FolDrejt/
