Kryeministri i Kosovës, Albin Kurti, duke folur për mediumin zviceran Tages-Anzeiger ka treguar “iniciativën” e presidentit serb, Aleksandar Vuçiq, kundër pranimit të Kosovës në BE, pas aplikimit zyrtar që bëri Kosova me 15 dhjetor 2022.
Kryeministri Kurti ka thënë se vetëm një ditë pas aplikimit zyrtar me 15 dhjetor, Vuçiq u ka shkruar të gjitha shteteve të BE-së që të mos e pranojnë aplikimin.
“Isha shumë krenar kur munda ta dorëzoj kërkesën për anëtarësim më 15 dhjetor. A e dini se çfarë bëri presidenti i Serbisë një ditë më pas? Ai u ka shkruar të gjitha shteteve të BE-së që mos e pranojnë aplikimin”, është shprehur kryeministri Kurti.
Njëkohësisht, kryeministri Kurti ka treguar se është i lumtur që Ukraina e ka marrë statusin si kandidate për t’u anëtarësuar në BE.
“Jam shumë i lumtur që Ukraina mori statusin. Ukraina e meriton. Ukrainasit meritojnë solidaritet të plotë në luftën e tyre kundër fashizmit rus.”, ka thënë kryeministri i Kosovës./FolDrejt/
