Kancelari austriak Sebastian Kurz (ÖVP) gjatë vizitës së tij në Prishtinë u shpreh hapur se “disa vende europiane janë kundër liberalizimit të vizave me Kosovën”, kurse në fakt edhe partneri i tij i koalicionit qeveritar FPÖ – është shprehur hapur kundër, shkruan foldrejt.com
“Unë do të bëj çdo gjë që është në fuqinë time që të ketë paqe në rajon. Ne përkrahim në shumë fusha Kosovën”, ai duke shtuar se Austria është skeptike për ushtrinë e Kosovës, e mbështet dialogun mes Prishtinës dhe Beogradit dhe se Austria pajtohet me secilin marrëveshje që është nga Kosova e Serbia- duke nënkuptuar edhe shkëmbimin e territoreve.
Kurse presidenti i Kosovës, Hashim Thaçi, tha se Kosova po punon në rrugën e saj për NATO dhe BE.
“Austria e ka rolin e saj të rëndësishëm në zhvillimin e Kosovës”, tha ai. Sipas tij vizita e Kancelarit të Austrisë, Sebastian Kurz, do të jetë impuls për zhvillimin e rajonit.
Tashmë duket se shkëmbimi i territoreve mes Kosovës dhe Serbisë po gjen më tepër mbështetje. Sipas një shkrimi të para disa ditëve të “Der Standard” marrëveshja e ‘korrigjimit të kufijve’ gjen përkrahje nga Hungaria, Austria, Franca, administrata Trump, kurse edhe Gjermania që ishte kategorikisht kundër, po kalon në një tranzicion post-Merkel.
