Në një intervistë për agjencinë TASS, ministri i Jashtëm i Rusisë, Sergej Lavrov, ka folur për marrëdhëniet me Shtetet e Bashkuara të Amerikës, por edhe për situatën në Ukrainë, përcjell Fol Drejt.
Kur bëhet fjalë për marrëdhëniet me Amerikën, veçanërisht për programin START, Lavrov shpjegoi se Rusia e ka pezulluar plotësisht pjesëmarrjen në këtë marrëveshje.
“Për të rivendosur kontaktet me ShBA-të, ata duhet të ndryshojnë sjelljen e tyre dhe të kthehen në parimet e civilizuara të zhvillimit të marrëdhënieve ndërshtetërore, duke përfshirë ato parime në traktatin START. Rusisë i është shpallur një luftë hibride dhe kjo do të jetë e gjitha. Shpresojmë që një ditë të mbizotërojë arsyeja, si dhe logjika e dialogut, jo e konfrontimit”, tha Lavrov.
Më pas Lavrov iu referua situatës në Ukrainë dhe tha se Perëndimi mbështet ideologjinë naziste në këtë vend.
“Në këtë rast, kjo bëhet përmes udhëheqjes së Ukrainës, e cila erdhi në pushtet ilegalisht. Ne i zhvillojmë aktivitetet tona në Ukrainë vetëm për shkak të atyre njerëzve që janë të shtypur dhe për shkak të shkeljes së atyre themeleve mbi të cilat u shpall pavarësia e Ukrainës, ku shprehimisht thuhet se Ukraina dëshiron të jetë një shtet neutral dhe jo bllok”, tha kreu i diplomacisë ruse.
Së fundi, ai theksoi se Rusia e di se për çfarë po lufton në Ukrainë.
“Ne e dimë se për çfarë po luftojmë. Ne e dimë se duam t’i çlirojmë këta njerëz nga çdo kërcënim për jetën dhe traditat e tyre. Historia dhe gjeografia nuk janë zgjedhur, ndaj nuk kemi të drejtë t’i lëmë këta njerëz t’i copëtojnë”, përfundoi Lavrov. /FolDrejt/
