Ministri Hajrullah Çeku, në vazhdën e përpjekjeve për plotësim-ndryshimin e Ligjit për Veprimtari Botuese dhe Librin, ka filluar takimet me grupe të ndryshme të interesit, duke e përfshirë këtu edhe komunitetin letrar, shkruan Fol Drejt.
Ministria e Kulturës, Rinisë dhe Sportit (MKRS), ka për synim përmirësimin dhe avancimin e infrastrukturës ligjore, në mënyrë që t’i lehtësohet “jeta” librit.
Nëpërmjet një komunikate për media, MKRS ka njoftuar se sot ministri Hajrulla Çeku, i shoqëruar nga këshilltarja politike Rozafa Imami dhe drejtoresha e Departamentit të Kulturës në MKRS Jehona Shyti, priti në takim komunitetin letrar.
Lexojeni të plotë komunikatën:
Libri me politikë të re e të qëndrueshme
Në kuadër të avancimit të infrastrukturës ligjore, grupi punues i themeluar për plotësimin dhe ndryshimin e Ligjit për Veprimtarinë Botuese dhe Librin ka filluar takimet e tyre të rregullta.
Në mënyrë që poltika e re e librit në vendin tonë të jetë e qëndrueshme dhe gjithëpërfshirëse, ministri Hajrulla Çeku, i shoqëruar nga këshilltarja politike Rozafa Imami dhe drejtoresha e Departamentit të Kulturës në MKRS Jehona Shyti, priti në takim komunitetin letrar.
Bashkë diskutuan modelet dhe praktikat që kontribuojnë në fuqizimin e fushës së librit, botimit dhe qarkullimit të tij, nxitjen e leximit, zhvillimin e koleksioneve të bibliotekave, si dhe çështje tjera që do t’i propozohen grupit punues për t’i përfshirë në Ligj.
Takimet dhe konsultimet me komunitetin letrar do të vazhdojnë deri në përfundim të procesit të plotësim-ndryshimit të Ligjit.
Përndryshe në këtë takim të pranishëm ishin poetja Blerina Rugova Gaxha, poetja Ervina Halili, shkrimtarët Imer Topanica, Adil Olluri, Azem Deliu, Besnik Jaha dhe përfaqësues nga Universiteti i Prishtinës.
Fol Drejt mëson se ministria synon t’i organizojë edhe disa debate në formate më të gjera, ku do të mund të diskutohej gjatë e gjerë për çështjen e librit./FolDrejt/
