Shqiptarët e të gjitha krahinave sot festojnë 108 vjetorin e pavarësisë së Shqipërisë, të shpallur nga Ismail Qemali dhe 39 firmëtarët, mes tyre edhe Haxhi Vehbi Dibra, Dom Nikollë Kaçori, Rexhep Mitrovia, Babë Dudë Karbunara, Mehmet Pashë Derralla, Zyhdi Ohri e shumë personalitete tjera nga mbarë trojet shqiptare, për të treguar edhe sot se shqiptarët jetojnë në shumë shtete por janë një shpirt, një identitet, informon foldrejt.com.
Liderët e Shqipërisë, Kosovës dhe Maqedonisë së Veriut sot na kanë uruar për këtë festë të madhe.
Lideri i Vetëvendosjes në Kosovë, tha se me 28 nëntorin kuptohen tre ngjarje të rëndësishmë historike.
“Sot janë tri ngjarje historike, Gjergj Kastrioti “Skënderbeu” në Krujë, Ismail Qemaili në Vlorë dhe Adem Jashari në Kosovë, këto kanë një të përbashkët 28 nëntorin që i bashkoi shqiptarët”.
Ai në Prekaz përmendi sakrificën e familjes Jashari.
“Jemi këtu në Prekaz, sepse 59 anëtarë në mesin e të cilëve 15 gra dhe 15 fëmijë, u flijuan në një luftë të pabarabartë që sot njihet si Epopeja e UÇK-së, e cila ia dha hovin vendimtar asokohe çlirimit të Kosovës”, tha ndër tjerash Kurti.
Në Vlorë sot qëndruan edhe kryeministri Edi Rama dhe presidenti Ilir Meta, kurse liderët e shqiptarëve të Maqedonisë së Veriut kanë uruar përmes deklaratave për shtyp.
Histori e shkurtër
Si sot, 108 vjet më parë në Vlorë, përfaqësues të vilajeteve shqiptare shpallën pavarësinë e shtetit shqiptar. Kuvendi Kombëtar i Vlorës, mbledhjen e tij të parë e mbajti më 28 nëntor 1912, me aktin e shpalljes së pavarësisë së shtetit shqiptar nga Perandoria Osmane. Shpallja e Pavarësisë së Shqipërisë ishte kurorëzim i përpjekjeve shekullore dhe luftërave të pareshtura që bënë shqiptarët për çlirimin e vendit.
Por për fat të keq, Qeveria e Vlorës pati një jetë të shkurtër, pasi për pak më shumë se një vit, ajo u detyrua të tërhiqej dhe t’i lëshonte vend një qeverie të drejtuar nga një princ i huaj, i emëruar nga fuqitë e kohës.
