Që prej të martës s’kanë pushuar kritikat ndaj Kryeministrit Kurti, pasi ky e përkujtoi politikanin serb Oliver Ivanoviq me një gjuhë që shprehte disi respekt ndaj veprimtarisë së tij, të njëjtit të cilit dikur i referohej si kriminel lufte, shkruan Fol Drejt.
Qytetarë të shumtë, figura publike e madje edhe deputetë të partisë së tij, e kritikuan ashpër këtë ndryshim qëndrimesh, ndërsa pati të atillë që kërkuan nga ai edhe të kërkonte falje.
Por ndërsa kritikat ndaj tij po vijojnë, në plan të dytë ka dalë çështja e Martin Berishajt, ambasadorit të Kosovës në Kroaci.
Dje me një deklaratë të bërë publike në murin e tij në Facebook, Berishaj provoi ta dëshmonte pastërtinë e tij, ndërsa hodhi poshtë akuzat që po i vishen për një skandal financiar, sipas versionit të gazetarit të Planet TV – Vitomir Petroviq (Vitomir Petrović).
“Pretendimi se unë kam fshehur apo deklaruar rrejshëm pasurinë, nuk qëndron dhe është i pavërtetë.
Sa i përket firmës Zaslon L.C.C. dhe Myloja sh.p.k., nuk janë në pronësinë time dhe për këtë e kam njoftuar edhe Agjencionin Antikorrupsion të Republikës së Kosovës në email zyrtar me datën 5 korrik 2022.
Ndërsa për dy kompanitë tjera, MB consulting d.o.o. në Mal të Zi, dhe MB consulting sh.p.k. në Kosovë, sqarimi dhe e vërteta është si vijon:
MB consulting d.o.o.
MB consulting d.o.o. në Mal të Zi nuk nuk ka pasur qarkullim që nga viti 2020 dhe mbyllja e saj fizike sipas organeve të Malit të Zi, pas kërkesës sime për mbyllje, ka qenë çështje ditësh, dhe meqenëse bëhet fjalë për një kompani që nuk ka pasur aktivitet që nga vitit 2020 dhe ka qenë në proces të mbylljes, nuk ka pasur arsye të deklarohet si pronë.
MB consulting d.o.o. si person juridik ka pranuar të hyra në periudhën 2017-2020, dhe të gjitha transaksionet janë bërë në mënyrë transparente përmes llogarisë bankare, dhe janë paguar të gjitha tatimet sipas legjislacionit në fuqi. Në lidhje me pretendimet e ngritura, Prokuroria atje ka zhvilluar hetimet, dhe ka mbyllur rastin sepse nuk ka gjetur asgjë nga pretendimet. Prandaj, akuza se jam nën hetime në Mal të Zi është e pavërtetë, sepse kjo është një çështje e mbyllur tashmë.
Pas shpifjes që është bërë ndaj meje me datën 21 prill 2022 nga Vitomir Petroviq në Planet TV, i cili po citohet nga mediat tona, kam bërë padi në Gjykatën e Qarkut në Lubjanë dhe lënda është në proces gjyqësor.
MB consulting sh.p.k.
Në këtë kompani, person juridik sipas legjislacionit në Kosovë, kam qenë aksionar deri me datën 13 tetor 2021, kur edhe kam bërë bartjen e të gjitha aksioneve të mia tek pala e tretë, përmes Kontratës për Dhurim. Prandaj në datën e deklarimit të pasurisë me 13 janar 2022 (tre muaj pas heqjes dorë nga pronësia), unë nuk kam qenë aksionar në këtë kompani, dhe nuk kam pasur se si ta deklaroj si pronë timen.
Ndërsa sa i përket deklarimit dhe pagesës së tatimeve, kompania MB consulting sh.p.k. ka deklaruar të gjitha detyrimet tatimore sipas legjislacionit në fuqi, në Adminsitratën Tatimore të Kosovës. Pagesa e një pjese të detyrimeve është bërë nga kompania që është person juridik, kurse pjesa tjetër vazhdon të paguhen nga kompania që tash është në pronësi të tjetërkujt. Kushdo që kupton nga kontabiliteti, e din që borxhi tatimor nuk ka fare të bëjë me shmangie tatimore, gjë për të cilën po shpifet kundër meje. Prandaj edhe kjo e pavërtetë bie në ujë, sepse asnjëherë nuk ka pasur shmangje tatimore, por bëhet fjalë për borxh tatimor, i cili është deklaruar nga vetë ndërmarrja, dhe vazhdon të paguhet.” – shprehet ndër të tjera Berishaj, duke ritheksuar edhe një herë që vetë GEN-i, nuk është kompani serbe, por Sllovene.
Por pavarësisht këtij shpjegimi, zërat për ta shkarkuar atë nga pozita e ambasadorit, nuk kanë pushuar. Kryetari i Lidhjes Demokratike të Kosovës (LDK) Lumir Abdixhiku, së fundi në seancën e parë të sezonit të ri të Kuvendit të Kosovës, ndër të tjera tha se për ambasadorin Berishaj do të ketë edhe kallëzim penal, për shkak të deklarimit të rrejshëm të pasurisë:
“…Ky ambasador duket që është i lidhur jo vetëm politikisht, por edhe financiarisht me mbrojtësit e tij. Sipas raportimeve tashmë të bëra publike, janë tërhequr nga ai në mes të Prishtinë 1. 4 milion euro para të gatshme kesh. Këto para janë transferuar tek kompania energjetike GEN, me seli në Beograd. Këto mjete e ky biznes janë mbajtur fshehtë, prandaj ambasadori ka dy kallëzime penale sot: një për shpëlarje parash e shmangie tatimesh dhe një tjetër për fshehje të pasurisë… por ai vazhdon të marrë mbrojtjen e pa-rezervë të pushtetarëve, përkundër fakteve të qarta të bëra publike dhe ai do të ketë edh një kallëzim penal të ri për deklarim të rrejshëm brenda komisionit hetimor parlamentar!”, tha Abdixhiku.
“E gjitha filloi kur Robert Golob u gjend në një hetim financiar ndërkombëtar për shkak të transferimeve në një kompani në Mal të Zi. Bëhej fjalë për 600 mijë euro, të cilat janë tërhequr cash” – raportonin mediat sllovene vitin e kaluar. Ai që e luajti rolin e “mushkës” sipas artikullit, doli të ishte vetë ambasadori Berishaj.
Megjithatë, Kryeministri i Sllovenisë Robert Golob, të enjten e ka quajtur trillim të pastër këtë histori, duke thënë se prapa kësaj historie të trilluar qëndronte partia SDS, duke theksuar se:
“E gjithë kjo është trillim i pastër!”.
Një dyshim i ngritur nga mediat vendore ndërlidhet edhe me importin e energjisë elektrike nga vendet e tjera, histori në të cilën është involvuar kompania GEN, në të cilën ka shërbyer Berishaj, në cilësinë e konsulentit.
Raportet e Korporatës Energjetike të Kosovës (KEK), tregojnë se deri më 31 dhjetor të vitit 2021, KEK ka importuar gjithsej 22.430 mWh energji elektrike.
Sipas një artikulli të Infokus, pikërisht në kohën e krizës më të madhe energjetike, Kompania GEN me zyre në Beograd, me të cilën u përfshi emri i ambasadorit të Kosovës në Kroaci, Martin Berishaj, po del se ka marrë miliona euro nga buxheti i shtetit, pikërisht në kohën e kolapsit energjetik.
Korporata Energjetike e Kosovës, sipas raporteve të shkëmbimit të energjisë elektrike që ka siguruar Gazeta Infokus, ka blerë energji elektrike në vlerë prej 4.2 milionë euro vetëm në muajin dhjetor 2021 dhe janar 2022, kurse ka shitur energji elektrike tek kjo kompani rreth 105 mijë euro.
Kjo kompani për të cilën u raportua se ambasadori Martin Berisha është këshilltar i tyre dhe u ngritën dyshime nga mediat për transaksione të dyshimta në vlerë mbi gjysmë milioni euro, në fakt sipas dokumenteve të siguruara nga Infokusi në vazhdimësi ka bërë tregtim të energjisë me KEK-un.
Megjithatë, duket që përkundër këtij konteksti të krijuar, Qeveria e Republikës së Kosovës, përkatësisht Ministria e Punëve të Jashtme, nuk e ka ndërmend ta shkarkojë atë. Këtë e ka thënë së fundi prerë dhe qartë, Ministrja Donika Gërvalla tha kjo gjë nuk do të ndodh, duke i cilësuar raportimet e mediave si “spekulime”./FolDrejt/
