Prej para disa muajsh media pan-europiane euractiv.de thekson se kryeministri Zoran Zaev mund të ketë lidhur një bashkëpunim me partinë e djathtë greke Demokracia e Re, që të rrëzojë nga pushtetit Syrizën e kryeministrit Aleksis Cipras. E gjithë kjo lidhet me mundësinë për të shfrytëzuar kontestin e emrit, ku e gjithë barra të bie mbi partinë greke në pushtet.
Atëkohë euractiv.de, duke u bazuar te prestigjiozja gjermane “FAZ”, shkruante se Zaev është takuar në dhjetor 2017 me Maria Spyraki, zëdhënësen dhe të besueshmen e liderit të Demokracisë së Re Kyriakos Mitsotakis. FAZ gjithashtu shton se Zaev është takuar herën e dytë me Spyraki në Bruksel, ku i ka sqaruar Shkupit zyrtar se pozicionet e Demokracisë së Re janë të vështira, për shkak të votuesve të saj, përcjell foldrejt.com.
Më tej burimet e EURACTIV në Shkup sqarojnë se Spyraki gjithashtu ka qenë pjesë e një delegacioni zyrtar europian, të cilët vizituan komitetin parlamentar në Shkup prej 19 deri 21 shtator. Zaev gjatë kësaj date ka qenë në Uashington ku është takuar me zv.presidentin Mike Pence, por Spyraki është takuar me ministren e mbrojtes, Radmila Sekerinska.
Të gjithë këto takime shfaqën dyshimin e partisë qeveritare greke Syriza, se Zaevi mund të mos e marrë seriozisht Marrëveshjen e Prespës. Për të mos përfunduar këtu, Zaevi para pak ditësh deklaroi se pas Marrëveshjes së Prespës “gjuha maqedonase” do i mësohet “minoritetit maqedonas” në Greqi. Kjo shkaktoi krizë te shumë funksionarë grekë të cilët nuk ngurruan ta quajnë edhe irredentiste deklaratën e Zaevit, por tërthorazi shton dyshimet se ai mund të ketë vërtet marrëveshje me opozitën greke – për të mos votuar ndryshimet kushtetuese në 15 janar. Mediat greke akuzojnë poashtu të parin e qeverisë maqedonase se pse nuk e quan “Maqedoninë” tashmë “Maqedonia Veriore”?
Jo më kot edhe “strategu i plasaritur” siç e quan Ali Ahmetin “FAZ”, kishte rezerva që kjo marrëveshje mund të kalojë pa asnjë problem.
Në rast se gjithçka shkon në rregull dhe Maqedonia voton në 15 janar ndryshimet kushtetuese, atëherë topi kalon në palën greke e cila duhet ta ratifikojë marrëveshjen vetëm në parlament. Kjo është një sprovë për Syrizan greke, pasi në 2019 Greqia mban zgjedhje komunale, parlamentare dhe për parlamentin europian./Foldrejt.com
