Ministri Hajrullah Çeku ka vizituar qytetin e Shtimes, ndërsa ka premtuar përmbylljen e projektit të bibliotekës së këtij qyteti, i cili, sipas tij, është shoqëruar “me shumë problematika”, shkruan Fol Drejt.
“Kështu do të duket Biblioteka e qytetit të Shtimes. Një projekt që kishte filluar në vitin 2019 dhe ishte i shoqëruar me shumë problematika, me mungesë të analizave të duhura dhe buxhetit adekuat” – ka shkruar ndër të tjera Çeku.
Ai ka premtuar se pas analizave “dhe rishikimit të projektit janë marrë masat mbrojtëse dhe kanë filluar punët për zbatimin e projektit me të gjitha fazat deri në funksionalizim të plotë”.
Ua kujtojmë se javë më parë Fol Drejt ka publikuar artikullin me titull “300 mijë euro shtesë për bibliotekën gjysmake që kushtoi 226 mijë euro”, sipas së cilit për një periudhë katër vjeçare, “janë nënshkruar dy Memorandume Bashkëpunimi mes Ministrisë së Kulturës dhe Komunës së Shtimes për ndërtimin e Bibliotekës dhe Arkivit të Shtimes.
Sipas bashkëpunimit të parë, Komuna e Shtimes për bibliotekë do t’i merrte mbi 226 mijë euro, kurse biblioteka që do të duhej të përfundohej, mbeti e përgjysmuar. Vitin e kaluar, Ministria e Kulturës përmes një tjetër Memorandumi Bashkëpunimi, do t’ia sigurojë edhe 300 mijë euro të tjera Shtimes për ta përfunduar projektin e lënë në gjysmë.”
Sipas të gjeturave të hulumtimit, shuma e të dy memorandumeve kapë vlerën e 520 mijë eurove, ndërsa projekti pritet të përfundojë në vitin 2024./FolDrejt/
