Në kohën kur kryeministri maqedonas Zoran Zaev provokoi lidershipin grek kur ftoi që në Greqi minoriteti “maqedonas” të mësojë “gjuhën maqedonase”, tashmë ka dalur edhe ministri i brendshëm bullgar me deklaratë të ngjashme si ajo e partive greke, shkruan foldrejt.com.
Krasimir Karakaçanov, zëvendëskryeministër për Sigurinë dhe ministër i Mbrojtjes në Bullgari, e paralajmëroi Zaevin të mos keqpërdorë temën e gjuhës maqedonase.
“Kjo mund t’iu kushtojë anëtarësimin në NATO dhe në BE”, tha ai, duke theksuar se Maqedonia e Veriut është emërtim gjeografik që përfshin edhe territore të Republikës së Bullgarisë.
Maqedonia dhe Bullgaria e arritën më 1 gusht marrëveshjen e fqinjësisë së mirë, përmes së cilës pretendohet të zgjidhin mosmarrëveshjet historike që kanë të bëjnë me gjuhën, kulturën dhe historinë maqedonase të paraluftës së Dytë Botërore.
Marrëveshja ishte nënshkruar edhe në gjuhën maqedonase, të cilën tani zyrtarët bullgarë e mohojnë.
Maqedonia ka probleme të brendshme me shqiptarët, serbët nuk ia njohin kishën, bullgarët gjuhën dhe kombin, kurse Greqia emrin dhe identitetin e shtetit. Duket se këto probleme nuk arrijnë të zgjidhen vetëm me një marrëveshje dypalëshe./Foldrejt.com
