Më 30 qershor të këtij viti, Ministria e Kulturës publikoi listën e OJQ-ve që u shpallën përfituese të “Thirrjes për projekt-propozimet Kulturore 2023” në Art dhe Trashëgimi Kulturore. Shuma totale e fondit financiar ishte 2 milionë e 765 mijë e 400 euro, e nga të cilat përfituan 116 OJQ. Mirëpo, jashtë listës mbështetëse mbeti organizata joqeveritare “Mural Fest Kosova“.
Nga Gëzim Olluri – Fol Drejt
Pasi që mbetën pa mbështetje nga MKRS, Mural Fest kishte vendosur të dërgojë ankesë në ministri me shpresën që do të rishikoheshin dokumentet dhe procedurat për t’u mbështetur financiarisht. Mirëpo, Ministria e Kulturës ia ka refuzuar ankesën, nën arsyen se kishte mungesë dokumentacioni, gjë që sipas burimeve të brendshme të organizatës nuk qëndron.
“Ministria e Kulturës, Rinisë dhe Sportit këtë vit ka refuzuar të mbështes MuralFest Kosova nën arsyetimin se nuk është përmbushur dokumentacioni i paraparë në thirrjen publike, fakt që sipas neve nuk qëndron. Në rezultatet preliminare nuk ishim të listuar në listën e përfituesve nën arsyen se nuk janë bashkangjitur dokumentet si forma e aplikimit dhe forma e buxhetit, gjë që nuk mund të jetë e vërtetë pasi që sistemi elektronik nuk e lejon bashkangjitjen e dokumenteve të tjera pa bashkangjitur ato bazë, që në këtë rast ishin projekt propozimi dhe buxheti“.
Mirëpo, kundërthëniet brenda Ministrisë së Kulturës janë vërejtur gjatë përgjigjeve të tjera arsyetuese ndaj Mural Fest Kosova. Herën e parë janë përgjigjur se mungojnë dokumente të tjera, derisa herën e dytë që mungon raporti i auditimit.
“Gjithsesi, ne e shfrytëzuam të drejtën tonë për ankesë dhe i bashkëngjitëm dokumentet që ata i konsideronin se mungonin. Pas ankesës kemi marrë përgjigje negative, këtë herë me arsyetimin se nuk është bashkangjitur raporti i auditimit. Nëse kthehemi te thirrja e publikuar nga kjo ministri, tek dokumentacioni nuk liston askund raporti auditimit, vetëm në një pyetje në formën e aplikimit nevojitej te cekeshin të hyrat vjetore. Megjithatë, ne e posedonim këtë raport për shkak të domosdoshmërisë së tij për një organizatë që ka të hyra të mëdha, por që nuk e kanë kërkuar paraprakisht. Ne prapë se prapë e dërguam edhe pas ankesës së parë dhe këtu hasëm në heshtje administrative, ku nuk na u është dhënë më arsyetim“, thuhet në përgjigjen e organizatës Mural Fest Kosova.
“Mural Fest Kosova” është OJQ që vepron nga viti 2016 me seli në Ferizaj. Merret me promovimin e artit, kulturës dhe edukimit përmes pikturimit. Fokusi i saj ka qenë tek pikturimi i muraleve në qytetin e Ferizajit, duke e shndërruar qytetin, figurativisht, në Qytet të Muraleve. Që nga themelimi, organizata ka punuar më shumë se 100 murale në Ferizaj dhe 50 murale në qytetet e tjera të Kosovës.
Por Fol Drejt mëson, sipas burimeve të organizatës Mural Fest Kosova, se do të aplikojnë sërish për aktivitetet që kanë mbetur duke shpresuar që kësaj radhe të marrin përkrahje financiare nga niveli qendror – Ministria e Kulturës, Rinisë dhe Sportit.
Organizata vetëm një herë është mbështetur financiarisht nga Ministria e Kulturës, Rinisë dhe Sportit. Kjo ka ndodhur vitin e kaluar pas reagimit publik nga ana e organizatës. Mbështetjet kryesore vijnë nga donatorët dhe ambasadat ndërkombëtare. Për Mural Fest veçohet edhe mbështetja në mesin e 19 shteteve të botës nga Bloomberg Philantrophies.
Bloomberg Philantropies është organizatë filantropike me seli në New York të Amerikës. Organizata investon në më shumë se 700 qytete dhe 150 vende anembanë botës. Fokusi i saj është bamirësia në fushat si: arti, arsimi, mjedisi dhe shëndeti publik./FolDrejt/
