Portali “Foldrejt.com” ka arritur të kryejë një intervistë me biznesmenin Sahit Muja, shefi i Albanian Minerals. Ai po investon në vendlindje në Tropojë dhe thotë se nëntoka e saj ka 20 miliardë tonë magnez, kurse vlera e saj e përgjithshme mund të shkojë deri në 40 trilion dollarë (2500 dollarë/toni). Kjo do mundësojë punësimin e sëpaku 2000 shqiptarëve nga Shqipëria dhe Kosova. Për më tepër lexoni në vijim intervistën e plotë.
Foldrejt.com: z.Sahit Muja, ju keni bërë tetë vjet përpjekje derisa erdhët në një zbulim, ku sipas jush në nëntokën e Tropojës ndodhen rezervat më të mëdha të magnezit dhe ngjashëm keni theksuar edhe për rezervat e kromit më të pastër në botë. Për çfarë ju gëzon ky fakt?
Sahit Muja: Ka 25 vite që punojmë intensivisht në bizneset minerale, kompania jone Albanian Minerals dhe kompanitë motra janë duke investuar intensivisht në Shqipëri. Një ndër zbulimet e këtij shekulli në Evropë mund të përmendim rezervën e magnezit në Tropojë qe kalon mbi 20 miliardë tonë, më e madhja dhe me cilësorja në botë.
Foldrejt.com: Nëse hapet fabrika sipas standardeve, sa persona mund të punësohen dhe sa mund të përfitonte arka e shtetit shqiptar?
Momentalisht jemi duke punuar me institutet shkencore në Japoni, Gjermani, Amerikë dhe Kinë për të bërë teknologjinë e shkrirjes. Kemi bërë gati shfrytëzimin dhe prodhimin. Industra e magnezit do të punësojë 2000 punëtorë nga Shqipëria dhe Kosova. Miniera është 7 kilometra nga kufiri i Kosovës.
Një ton magnez i shkrirë kushton mbi $2500. Shqipëria do të fitojë 100 përqind të të ardhurave, pasi ne nuk do nxjerim asnjë dollarë jashtë vendit. Kjo pasuri është e kombit shqiptarë.
Foldrejt.com: Përveç Tropojës, keni analizuar ndonjë rajon tjetër shqiptar – ku mendoni sa ka tepër pasuri nëntokësore?
Ne gjithashtu kemi ndërtuar miniera gjigante të mineralit të kromit. Nga zbulimet tona është gjetur kromi më i mirë i botës, gjithashtu rezerva të klasit botërorë.
Kemi bërë shumë studime në mbare tokat shqiptare ku jemi në proces, kemi zbuluar shume metale dhe jometale në shume rajone të trojeve shqiptare. Toka shqiptare sidomos në Shqipëri e Kosovë është një thesar në zemrën e Evropës. Ne po japim shembullin tonë.
Foldrejt.com: Kur jemi te Tropoja, çfarë mendoni rreth hidrocentraleve që po ndërtohen mbi atë vend të bukur. Ia vlen energjitika përpara turizmit malor?
Për hidocentralet e Tropojës unë mendoj që nuk duhej të jepet leja e tyre. Valbona e Tropojës është një ndër mrekullitë e botës. Unë jam për energji të gjelbërt, jam investor në shumë kompani energjie të gjelbërt. Tropoja ka erëra të fuqishme, ku vetëm disa turbina 7 Megawat Wind Energy mund të zëvendësonin këto hidocentrale. Gjithashtu ka pafundësi në energjinë solare, Tropoja ka klim te paster, diell te fuqishem dhe netë të freskëta. Disa hektarë me këto do zëvendësonin hidocentralet.
Foldrejt.com: Thuajse çdoherë në postimet tuaja falenderoni Zotin dhe uroni që të “bashkohet gjithë kombi shqiptarë”. Pse?
Kush të falenderohet tjetër vetëm krijuesi i pashoq – Zotit të madhëruar. Unë jam besimtar, studius i fesë. Zoti ka krijuar gjithçka. E Tijë është gjithësia, pasuria, jeta, shpirti. Unë shpesh mërzitem që se falenderoj Zotin sa herë marrë frymë dhe për çdo aktivitet që bëj në pasurinë e tijë, në mëshirën dhe dhuratat e Tijë në çdo sekondë të jetës. Zemra ime rrahë 1,1,1 – Zoti është një, Zemra është thesari im i mbushur tërsisht me dashuri për Zotin.
Foldrejt.com: Çfarë këshillon bashkatdhetarët, që të ndihmojnë për të ndaluar largimin e rinisë nga vendlindja?
Trojet tona janë ndër më të pasurat në botë, nuk do gjejne kurre vend më të bekuar. Është koha të ndërrohet kjo klasë politike që po i pi gjakun vendit. Nuk duhet të ikim, por të rezistojmë, ndërrojmë qeverisjen, punojmë.
Foldrejt.com: Dhe në fund, si e shihni të ardhmen e shqiptarëve në Ballkan dhe Botë?
Unë gjithnjë punoj për unifikimin e trojeve shqiptare ndaj lutem ashtu. Të ardhmen e shqiptarëve në Ballkan e shikoj me shumë pozivitivitet. Jemi komb dinamik, punëtor, në rritje, në edukim.
Foldrejt.com: Sahit Muja, ju falenderojmë për intervistën.
