Policia e Kosovës ka njoftuar se në Bistricë të Leposaviqit, pjesëtarët e saj, përderisa ishin duke e kryer detyrën, janë ballafaquar me një situatë aspak të lehtë, shkruan Fol Drejt.
Sipas PK-së, ndërsa kanë qenë në një pikë kontrolli, një automjet i dyshuar nuk u është bindur urdhërave, ndërsa ua ka goditur veturën zyrtare, me ç’rast, pjesëtarët e policisë janë detyruar të hapin zjarr.
“Sot, më 23 janar në Bistricë të Leposaviqit, një njësi policore ka qenë e caktuar me detyrë zyrtare në pikë kontrolli, me qëllim të ruajtjes së rendit dhe sigurisë publike si dhe parandalimit të krimit e kontrabandës.
Njësia policore e cila ka qenë në pikë kontrolli, gjatë realizimit të detyrave policore ka tentuar ta ndalojë një veturë, e cila gjatë lëvizjes ka goditur automjetin e Policisë së Kosovës duke rrezikuar drejtpërdrejt edhe jetën zyrtarëve policorë, të cilët për të neutralizuar rrezikun ndaj tyre kanë shtënë me armë zjarri.
Personat e dyshuar, së bashku me mjetin e tyre janë larguar nga vendi i ngjarjes, përderisa hetimet lidhur me rastin janë duke u kryer, në bashkëpunim dhe koordinim me organet e drejtësisë.
Lidhur me rastin, Policia e Kosovës ka njoftuar edhe Inspektoratin Policor të Kosovës për procedura të mëtejme” – thuhet në njoftimin e PK-së.
Lista Serbe, në anën tjetër, pretendon se me këtë rast është plagosur një qytetar serb./FolDrejt/
