Përgjatë deklarimeve jashtë rendit të ditës, deputetët opozitarë kanë bërë thirrje për votimin e tërheqjes së 30% nga TRUSTI, duke argumentuar që kjo është një mënyrë e mirë për ta zbutur krizën ekonomike të inflacionit. Mirëpo një ide e tillë është kundërshtuar nga Ministri i Financave Hekuran Murati, shkruan Fol Drejt.
Deputeti nga radhët e Aleancës për Ardhmërinë e Kosovës (AAK), Pal Lekaj, ka thënë se:
”E vërteta është që Vetëvendosja ka ardhë në pushtet duke marrë shumicën e votave të qytetarëve duke iu premtuar mirëqenie e jetë të dinjitetshme. Muajt e fundit nga terreni në takimet me qytetarë, po shohim se ata janë lodhur nga trendi i rritjes së çmimeve në secilin produkt.
…Lërini krenarinë anash, lërini anash ndjenjën e fituesit, e rëndësishme është që kjo ide është e duhur dhe ju ndihmon shumë qytetarëve në jetën e tyre”.
Sipas Lekajt, kjo është një mënyrë për ndaljen e trendit të ikjes.
“Pra, t’i bëjmë krenarë ata që na votuan me votën e tyre. E në këtë moment, më të mirin mund ta bëjmë nëse u lejojmë atyre, të tërheqim 30% të TRUST-it” – ka thënë Lekaj.
Mirëpo si kundërpërgjigje ndaj kritikave dhe thirrjeve të deputetëve opozitarë, Ministri i Financave Hekuran Murati ka thënë se qeveria ka bërë aq sa ka mundur për ta përballuar krizën në fjalë.
“Në vazhdimësi po thuhet se qeveria nuk ka bërë asgjë ose masat që i ka marr qeveria janë të njëhershme, prandaj duhet me e tërheqë TRUSTIN.”
Më pas ai i ka përmendur me radhë masat të cilat i ka marr qeveria, për zbutjen e krizës së inflacionit.
Ai e ka hedhur poshtë argumentin se tërheqja e TRUSTIT do t’i ndihmonte të punësuarit, sidomos ata që kanë pagë minimale dhe që janë të punësuar në sektorin provat:
“Sa kanë TRUST ata që kanë pagë minimale? Mujnë m’i pasë nja 100 euro të mbledhta. Domethënë 30%-dëshi i 100 eurove është 30 euro, a me këto doni me i ndihmu qytetarët a?”.
Murati, më tutje i ka përmendur edhe disa kategori të tjera, të cilat nuk kanë fare “rezerva” në TRUST.
Debati është duke vijuar me replika dhe kundëreplika./FolDrejt/
