Ekonomia e Mbretërisë së Bashkuar, ka krijuar vende pune me një ritëm të shpejtë në muajin prill, megjithatë, rritja e pagave për punëtorët britanikë është ngadalësuar.
Norma e punësimit arriti në një nivel rekord të lartë prej 75.6 për qind, ndërkohë që ekonomia shtoi 146 mijë vende pune, sipër projeksioneve të analistëve. Norma e papunësisë qëndroi në 4.2 për qind, që është niveli më i ulët që prej vitit 1975.
Megjithatë, ngadalësimi i rritjes së pagave tregon se ekonomia ka ende kapacitet të lirë. Rritja e pagave përjashtuar bonuset u ngadalësua në 2.8 për qind në periudhën Shkurt-Prill, sipas zyrës së Statistikave në Londër.
Kjo e vështirëson punën për Bankën e Anglisë, që po e monitoron me kujdes këtë tregues. Pritshmëritë për një ndërhyrje të bankës në muajin Gusht janë tërhequr, pas të dhënave në fillim të javës që treguan se manifaktura, ndërtimi dhe tregtia pësuan rënie.
Paundi pësoi rritje të lehtë pas publikimit të të dhënave mbi tregun e punës, duke prekur 1.3414 kundër dollarit. Ndërkohë që inflacioni është ngadalësuar në 2.5 për qind, ekonomitë familjare kanë pësuar një rritje të pagave reale.
Prilli përbën një muaj të rëndësishëm për këtë tregues, pasi nis viti i ri financiar si për qeverinë, që punëson më shumë se 5 milionë punonjës, ashtu edhe për firmat e sektorit privat.
