Pas dorëheqjes së kancelares Angela Merkel, nga kandidimi për postin e udhëheqjes së partisë CDU, janë shfaqur tre kandidatë potencialë: Friedrich Merz, Jens Spahn dhe Annegret Kramp-Karrenbauer. Dy të parët njihen si konservatorë, kurse e treta njihet si besnike e politikave të Merkel. Në vijim Foldrejt.com, ju tregon për personalitetet dhe pritshmëritë e tre kandidatëve të deritanishëm.
Kush është Friedrich Merz?
Friedrich Merz, sot 62 vjeçar, në fakt kishte përfunduar karrierën e tij politike. Nga 1994 deri 2009 ai ishte deputet, ndërsa nga 1998 deri 2000 zv.shefi i unionit të dy partive simotra gjermane CDU/CSU. Për pak kohë zgjidhet edhe si shefi i unionit, ndërsa në 2004 mposhtet nga Angela Merkel. Tre vite më vonë tërhiqet nga politika, për shkak të “diferencave brenda partiake”, për t’u marrë me karrierën e tij si jurist.
Idetë e tij janë liberale në ekonomi dhe konsevator në vlera. Merz shpesh ka folur për kulturën “dominante gjermane”, kundër dyshtetësisë dhe ka kritikuar ritualet tradicionale muslimane. Poashtu ka kërkuar nga emigrantët që duhet të pranojnë zakonet e tyre gjermane.
Me Merkelin ka pasur raporte tendencioze, për shkak edhe të rivalitetit të vjetër politik. Ai kandidon si kundërpol i Merkelit dhe jo si i besueshmi i saj.
Fitorja e tij do sjellte një ndryshim të rrënjësishëm të politikave të kancelares Angela Merkel. Por gjasat janë të vogla, pasi treni i tij ka ikur.
Kush është Jens Spahn?
Ai vlen si kandidat i ri, pasi ka 38 vjeç, kurse karrierën politike e ka nisur herët. Pjesë e Bundestagut ka qenë prej në moshën 22 vjeçare, kurse ndër ministrin ëolfgang Schäuble ishte sekretar shtetëror në ministrinë e financave. Si rallë ndonjë kancelar tjetër, Spahn vlen si besimtar katolik, pavarësisht se kundërshton kishën në trajtimin ndaj homoseksualitetit. Një pjesë e konservatorëve të CDU, do e mbështesnin 38 vjeçarin, por jo edhe Merkel, shkruan foldrejt.com.
“Unë orientohem drejt ritualit dhe traditës,” thotë ai. Përkundër Merkelit, ai thotë se Islami nuk është pjesë e Gjermanisë.
Poashtu ka qenë prej kohësh për obligimin e shkuarjes në ushtri. Momentalisht mban postin e ministrit të shëndetësisë, por për hir të së vërtetës, më shumë merret me çështje konsevatore sesa me shëndetësinë.
Në jetën e përditshme ai di të vallëzojë mirë dhe kryen shpesh ruta me biçikleta.
Kush është Annegret Kramp-Karrenbauer?
Annegret Kramp-Karrenbauer (56) është kandidatja e preferuar e Merkelit, edhepse kjo e fundit nuk e ka shprehur hapur. 56 vjeçarja ka kryer karrierën në Saarland, ku ka shërbyer si ministre për 12 vjet. Studimet i ka mbaruar në shkencat politike. Në 2018 lë vendlindjen dhe zhvendoset në Berlin, ku përgatitet në postin e pasardhëses së kancelares.
Kramp-Karrenbauer është mbështetëse e trashëgimisë liberale të Merkelit. Ajo vetë është pasqyrë e një familje moderne: burri i saj rriti tre fëmijët, kur ajo kryente karrierën.
Ajo ka qenë pro shërbimit njëvjeçar të të rinjve në shoqërinë gjermane, ka qenë skeptike për martesat e të njëjtit seks dhe së fundi ka vendosur në pikëpyetje dyshtetësinë për turqit. Në politikën e refugjatëve ka mbështetur hapur Merkelin, shkruan foldrejt.com.
Jashta politikës Kramp-Karrenbauer ka marrë pjesë shpesh në karnavale.
