Në emër të Qëndrës Islame Kulturore Shqiptare dhe Shkollës Islame Miraxh, një grup i anëtarëve të bordit të Qëndrës Islame Kulturore Shqiptare dhe përfaqësues nga Shkolla Islame Miraxh, vizituan të hënën Tempullin e Sinagogës së Emanu-El për të ofruar mbështetjen dhe ngushëllimet për rabinin Sussman dhe komunitetin hebre për tragjedinë që ndodhi në Sinagogën e Pitsburgut në lutjen e mëngjesit së të shtunës, shkruan foldrejt.com
Në vizitën senzibilizuese në Tempullin e Sinagogës Emanu-El morrën pjesë kryetari i Qëndrës Islame Kulturore Shqiptare, Dr. Zurkani Vardari, sekretari Ferid Bedrolli, zëdhënësi Dr. Tahir Kukaj, drejtoresha e Shkollës Islame Mirazh Xhihan Teufiq, si dhe studentët pranë kësaj shkolle Ensar Vardari, Iman Bedrolli, Saliha Bedrolli dhe Adem Kukaj.
“Në momentet e para pas përhapjes së lajmit për vrasjen e besimtarëve hebre në sinagogën Tree of Life në Pitsburg, Qendra Islame Kulturore Shqiptare doli me deklaratë publike për media, ku shprehëm përkrahjen tonë për viktimat dhe familjet e tyre, si dhe për mbarë komunitetin hebre në SHBA”, tha për Foldrejt zëdhënësi i Qëndrës Islame Kulturore Shqiptare Dr. Tahir Kukaj.
Nëpërmjet pjesëmarrjes aktive nëpër takimet e solidaritetit të cilat u organizuan në Nju Jork, imamët e Qëndrës Islame Kulturore Shqiptare dënuan ashpër vrasjen e njerëzve të pafajshëm kudo në botë.”Qëndra Islame Kulturore Shqiptare dhe Shkolla Islame Miraxh organizuan një lutje fetare me stafin dhe gjithë nxënësit e shkollës. Ne dënojmë sulmin terrorist të kryer në sinagogën e Pitsburgut dhe shprehim ngushëllimet e përzemërta për familjarët e viktimave të komunitetit hebre dhe mbarë popullit amerikan. Është e papranueshme që hebrenjtë të vihen në shenjestër gjatë adhurimit në mëngjesin e së shtunës”, tha Kukaj.
“Besimi islam dhe tradita kombëtare shqiptare vlerësojnë jetën e njeriut në përgjithësi si të shenjtë, pa dallim race, feje apo çfarëdo kriteri tjetër. “SHBA-të kanë traditë në tolerancën dhe respektin e ndërsjelltë ndërftare. Kjo traditë civilizuese, por edhe e rregulluar me Kushtetutën e SHBA-së, ditën e shtunë me 27 tetor u përgjak me vrasjen e besimtarëve të pafajshlm në vendin më të sigurtë ku ndihen besimtarët, pra në faltoren e tyre”, tha më tej Kukaj./Foldrejt
