Ashtu siç edhe pritej, tensionimi i marrëdhënieve mes Prishtinës dhe Beogradit përgjatë muajt e fundit ka shpërthyer në asamblenë e Kombeve të Bashkuara dhe atë mes dy presidentëve: Hashim Thaçi dhe Aleksandër Vucic.
Thaçi u shpreh plot bindje se gabimi i vetëm i Kosovës në krijimin e ushtrisë është “se ka pritur pa nevojë 5 vite dhe se javën e kaluar nuk ka ndodhur asgjë e pazakontë në Kosovë”, përcjell foldrejt.com.
“Çfarë ka të jashtëzakonshme këtu?”, ka pyetur Thaçi. “Asgjë fare, që është në kundërshtim me rezolutën 1244, pakon e Ahstisaarit, Kushtetutën e Republikës së Kosovës, apo të drejtën ndërkombëtare”, ka shtuar Thaçi. “Pikë së pari, rezoluta 1244, paragrafi 15, i referohet vetëm demilitarizimit të UÇK’së, proces i përmbyllur në kohë rekorde dhe pa incident në shtator 1999”, ka kujtuar ai.
Thaçi është ndalur edhe te Gjykata Ndërkombëtare e Drejtësisë e cila e shpalli të ligjshme pavarësinë e Kosovës, pra këtu buron e drejta e “pakontestueshme e Kosovës të ketë ushtrinë e saj”. Nuk është ushtria e Kosovës kërcënim për rajonin, janë deklaratat e Serbisë për luftë.
Në fund Thaçi tha se për dallim nga Serbia që kundërshton ushtrinë, vetë serbët e Kosovës janë pro krijimit të ushtrisë dhe se dorëheqja e pjesëtarëve serbe nga FSK ka qenë nën kërcënimin e vijueshëm të Serbisë.
Në anën tjetër, Vucic, përveç që kritikoi vendimin e Kosovës për të rritur me 100 përqind tarifat ndaj produkteve serbe, ai e paraqiti vendin e tij si viktimë të politikave provokuese të Kosovës.
“Serbia ka nënshkruar marrëveshje në Bruksel, dhe të gjitha obligimet nga ajo marrëveshje, ku kemi bërë shumë konsensione dhe e kemi pasur të vështirë para qytetarëve tanë, ne i kemi përmbushur. Dhe Prishtina ka pasur vetëm një obligim nga ajo marrëveshje, krijimin e Asociacionit të Komunave me shumicë Serbe. Sot kemi 2070 ditë që nuk është bërë kjo e as që e kanë ndërmend ta bëjnë. Ne i kemi kryer të gjitha obligimet tona. Ne i kemi bërë të gjitha, pjesëmarrjen në zgjedhjet lokale, sistemin e drejtësisë, policisë. Ne e konsiderojmë provokim anëtarësimin e Kosovës në mekanizma ndërkombëtarë, si INTERPOL e UNESCO, apo organe të tjera, por kanë provuar ta bëjnë këtë. I kemi lutur të mos e bëjnë,” tha Vucic duke shtuar edhe për vështirësitë që kanë serbët për t’u kthyer në shtëpitë e tyre në Kosovës.
“Do të donim që të ftojmë OKB-në që të marrë rol më të madh në të ardhmen, s’kemi asgjë kundër BE-së, por duam që OKB të marrë më shumë rol, që ta ndal provokimin nga Prishtina. Dua të them në serbisht disa fjalë që u drejtohen serbëve në Kosovë. Nga këtu dua që t’ju falënderoj për gjithçka që keni përjetuar dhe po përjetoni dhe Serbia do të jetë me ju,” tha në fund Vucic në rolin e viktimës, një politikë e njohur sllave karshi botës.
Por Thaçi ka arritur t’i kundërpërgjigjet mirë viktimizimit serb, kur ka shtuar se gjatë Luftës së Kosovës janë vrarë 13.500 shqiptarë dhe janë dhunuar 20 mijë femra – por për këto krime nuk është akuzuar dhe as që është dënuar ndokush.
Kina dhe Rusia kundër, Franca neutrale, SHBA, Britania dhe Hollanda “për”
Gjatë seancës kanë folur edhe përfaqësuesit e shteteve më të fuqishme. Kazakistani dhe Peruja kanë kundërshtuar ushtrinë e Kosovës me pretekstin se bie ndesh me rezolutën 1244. Aleati i Serbisë, Rusia, u shpreh kategorikisht kundër ushtrisë së Kosovës duke thënë se nëse “FSK-ja do të zbarkojë në veriun e populluar me serbë kjo do të nënkuptonte gjakderdhje”, përcjell foldrejt.com.
Ambasadori rus Vasily Nebenzya bile ka kritikuar edhe Gjykatën Speciale që nuk po tregon rezultate në “arrestimin e komandantëve të UÇK.”
Kundër formimit të Ushtrisë së Kosovës është shprehur edhe përfaqësuesi i Kinës.
“Palët duhet të përmbahen nga çdo retorikë apo veprim që mund të përshkallëzojnë më tej situatën. Kina respekton sovranitetin dhe integritetin territorial të Serbisë dhe e uron atë në përpjekjet e Serbisë për të gjetur zgjidhje politike”, ka thënë përfaqësuesi i Kinës, vend që nuk njeh pavarësinë e Kosovës.
SHBA poashtu ka konfirmuar përkrahjen e saj ndaj Ushtrisë së Kosovës, duke thënë se është në përputhje me rezolutën 1244. “FSK nuk është UÇK. FSK është një forcë e ndarë e veçuar, miltietnike e themeluar pas pavarësisë së Kosovës të cilën Gjykata Ndërkombëtare e ka shpallur se nuk e ka shkelur rezolutën dhe është në përputhje me planin e tranzicionit”, është shprehur ambasadori amerikan në KB, Jonathan Cohen.
Franca ehe pse ka nënshkruar deklaratën për të përkrahur të drejtën e Kosovës për të pasur ushtri, përfaqësuesi i saj në Këshillin e Sigurisë të OKB-së, Francois Delattre, ka thënë se votimi për Ushtrinë e Kosovës ka ardhur në një kohë të papërshtatshme. Poashtu Franca ka kërkuar tërheqjen e taksës 100 përqind për produktet serbe.
Përfaqësuesit e Britanisë së Madhe dhe Hollandës kanë theksuar se shteti sovran i Kosovës ka të drejtë në transferimin e FSK-së, dhe kjo nuk bie ndesh me Rezolutën 1244, dhe po ashtu është në harmoni me Kushtetutën e Kosovës./Foldrejt.com
