Politikologu nga Kosova Albinot Maloku ka dhënë një intervistë për të përditshmen sllovene “Delo”. Ai ka reflektuar mbi situatën politike në Kosovë, ndërsa Serbinë e Aleksandër Vuçiqit e ka cilësuar si faktor destabilizues në Ballkan, shkruan Fol Drejt.
Maloku është shprehur i befasuar se si presidenti serb Vuçiq ashiqare koketon me Putinin e Rusisë, ndërsa Bashkimi Evropian (BE), vijon t’i bëjë presion më shumë Kosovës.
“Aleksandar Vuçiq aktualisht është Serbia! Është një Serbi pro-ruse, pa pasoja nga perëndimi. Është e çuditshme sesi Perëndimi e lejon Serbinë të ketë këtë qasje pro-ruse dhe haptazi destabilizuese ndaj Ballkanit Perëndimor. Serbia ka probleme me të gjithë fqinjët e saj. Aleksandar Vuçiq i përdor të gjitha këto në mënyrë perfide për të zgjeruar ndikimin dhe pushtetin e tij. Ky është padyshim një shqetësim” – është shprehur ndër të tjera Maloku.
Në vijim mund ta lexoni një pjesë të intervistës së shkëputur nga Delo sllovene:
Delo: Ndoshta vendim për dorëheqjen nuk është marrë pa dijeninë e autoriteteve në Beograd, si e shihni rolin e regjimit të Vuçiqit në ngjarjet në Kosovë?
Albinot Maloku: Beogradi zyrtar ishte i informuar për vendimin e Qeverisë së Kosovës, por Serbia ende paraqitet si faktor destabilizues në normalizimin e marrëdhënieve me Kosovën. Korpusi politik serb në Kosovë është i bllokuar nga Lista Serbe, një subjekt politik që është një me Partinë Progresive Serbe, e udhëhequr nga presidenti Aleksandar Vuçiç, dhe kjo ka mbytur demokracinë në mesin e serbëve në Kosovë. Çdo veprim i politikanëve serbë në Kosovë bëhet sipas udhëzimeve të presidentit Vuçiq. E dini, ata takohen çdo herë me të dhe nuk mund të thuhet ndryshe, serbët e Kosovës po manipulohen nga presidenti Vuçiq. Roli i presidentit Vuçiq dhe i qeverisë së tij është mjaft aktiv në destabilizimin e çdo përpjekjeje për normalizimin e marrëdhënieve ndërmjet Serbisë dhe Kosovës. Edhe rrjedhën e fundit të ngjarjeve e drejtoi presidenti i Serbisë, Vuçiq.
Delo: Kritikët e Vuçiqit në Serbi pohojnë se ai vepron në tangencë me Albin Kurtin, të cilin, sipas kritikës, e ngjyros dhe e përdor për të qëndruar në pushtet. Si e shihni atë tezë?
Albinot Maloku: Aleksandar Vuçiq aktualisht është Serbia! Është një Serbi pro-ruse, pa pasoja nga perëndimi. Është e çuditshme sesi Perëndimi e lejon Serbinë të ketë këtë qasje pro-ruse dhe haptazi destabilizuese ndaj Ballkanit Perëndimor. Serbia ka probleme me të gjithë fqinjët e saj. Aleksandar Vuçiq i përdor të gjitha këto në mënyrë perfide për të zgjeruar ndikimin dhe pushtetin e tij. Ky është padyshim një shqetësim. Nga ana tjetër, kryeministri Albin Kurti është gati dy vite në qeveri, me një numër rekord të votave pas zgjedhjeve të fundit në Kosovë dhe e gjithë kjo situatë dhe këto tensione nuk i garantojnë atij qëndrimin në pushtet. Nuk është e vështirë ta rrëzosh nga pushteti, aq sa thuhet se i shfrytëzon këto situata për të qëndruar në pushtet.
Delo: Sa mund të kontribuojë përmirësimi ekonomike në përmirësimin e mjedisit politik në Kosovë?
Albinot Maloku: Së pari, qytetarët e Kosovës janë ende më të izoluarit në kontinentin evropian. Bashkimi Evropian nuk po bën sa duhet për liberalizimin e vizave, përveç fjalëve të thata. Kosova me vite ka përmbushur shumë kushte dhe parakushte. Sido që të jetë, kjo qasje e BE-së rëndon mbi qytetarët e Kosovës, të cilët edhe pse janë më pro-evropianët në rajon, janë njëkohësisht edhe më të izoluarit. Tani që duhet të merremi me ekonominë, veçanërisht pas pandemisë Covid-19 dhe inflacionit të lartë, Kosova duhet të përballet me ekzistencën e territorit të saj, të kërcënuar nga Serbia. Nëse këto rrethana vazhdojnë, sigurisht që nuk do të jetë mirë as për Ballkanin, as për Evropën, pa përmendur marrëdhëniet mes Kosovës dhe Serbisë.
Delo: Ka paralele të caktuara që tërhiqen ndërmjet situatës në Kosovë dhe BeH, sa mund ta përkeqësojë stabilitetin e një vendi tjetër rritja e destabilitetit në një vend?
Albinot Maloku: Që nga shpallja e pavarësisë së Kosovës në shkurt 2008, janë bërë disa përpjekje për ta lidhur situatat mes Kosovës dhe Bosnje-Hercegovinës, por këtu e vetmja paralele mund të merret faktorin politik destabilizues i Beogradit, si në Bosnje-Hercegovinë, po ashtu edhe në Kosovë, përmes politikanëve të kontrolluar nga presidenti Vuçiq. Megjithatë, nëse flasim për stabilitet politik dhe të sigurisë në Ballkan, të gjitha vendet ndikojnë njëra-tjetrën. Bosnja dhe Hercegovina dhe Kosova ende nuk kanë marrëdhënie, dhe kjo për shkak të politikës së Beogradit zyrtar dhe jo mungesës së vullnetit të Sarajevës dhe Prishtinës për marrëdhënie të mira.
Delo: Që nga fillimi i luftës në Ukrainë, frika nga ndikimi malinj rus në rajon dhe frika nga zgjerimi i konfliktit në Ballkan janë rritur ndjeshëm. Si i shihni këto frikëra?
Albinot Maloku: Pa dyshim, frika e zgjerimit të ndikimit rus në Ballkan është vazhdimisht e pranishme. Rusia ka ende një kanal komunikimi me Serbinë. Ju kujtohet se në shtator të këtij viti, ministrat e jashtëm të Serbisë dhe Federatës Ruse nënshkruan një marrëveshje në margjinat e mbledhjeve të OKB-së. Çfarë përmban dokumenti nuk është paraqitur për publikun asnjëherë. Nënshkrimi u promovua nga diplomacia serbe dhe është padyshim shqetësuese. Shqetësues është edhe fakti që Bashkimi Evropian nuk kërkon me ngulm nga Serbia të tregojë qëndrimin e saj ndaj agresionit të paprovokuar rus në Ukrainë. Nga ana tjetër, që nga fillimi i këtij agresioni, Republika e Kosovës dënon veprimet e Moskës ndaj Kievit, si dhe krimet e kryera në Buça e vende të tjera në Ukrainë nga forcat ruse, veprime të cilat i kemi parë dhe përjetuar edhe ne në Kosovë gjatë luftës./FolDrejt/
