Ish sekretari i Vetëvendosjes Dardan Molliqaj mbrëmë në një emision televiziv guxoi të tërhiqte paralele, duke e krahasuar represionin e ushtruar dikur nga aparatura shtetërore e udhëhequr nga Sllobodan Milloshoviqit ndaj shqiptarëve të Kosovës, për shkak të së cilës shqiptarët u detyruan të largoheshin nga puna, me braktisjen e institucioneve nga serbët sot, shkruan Fol Drejt.
Për këtë paralele ai është kritikuar ashpër, ndërsa një reagim për këtë deklaratë e pati edhe politikologu Albinot Maloku, i cili konstatoi që kritikat e Molliqajt adresuar qeverisë, janë të udhëhequra nga urrejtja.
Më saktë Molliqaj tha:
“Problemi në veri nuk mund të trajtohet me përdorimin e forcës dhe fuqisë. Mënyra si e kemi trajtuar problemin e veriut kohëve të fundit dhe serbëve në veri, unë mendoj se ka rrezik dhe ka ngapak ngjashmëri me qysh na ka trajtu neve Millosheviqi.”
Për këtë reagoi Maloku i cili në llogarinë e tij në Facebook shkroi:
“Kur kritika është e ushqyer nga urrejtja, atëherë rast eklatant për të shpjeguar këtë është Dardan Molliqaj. Për ta kritikuar kryeministrin Kurti si qeveritar e drejtues vendi, ka hapësirë boll, mirëpo me thënë se: “Mënyra si e kemi trajtuar problemin e veriut kohëve të fundit dhe serbëve në veri ka ngapak ngjashmëri me qysh na ka trajtu neve Millosheviqi”, është siç kishte me thënë filozofi grek Plutarku, urrejtje me tendencë për të përfituar nga të gjitha rastet për të dëmtuar të tjerët.
As edhe një ngjashmëri nuk ka dorëheqja e serbëve nga institucionet legjitime të Kosovës me largimin e dhunshëm të shqiptarëve nga të gjitha institucionet e sistemit kur në krye të Jugosllavisë e Serbisë erdhi kasapi i Ballkanit, Sllobodan Millosheviq.”
Ua kujtojmë se pas dorëzimit të mandateve nga deputetët e Listës Serbe, një numër i madh policësh, gjyqtarësh dhe nëpunësish të tjerë serbë në institucionet e Kosovës, kanë dhënë dorëheqje, duke e krijuar atë që njohësit e zhvillimeve politike po e cilësojnë si vakum institucional në komunat e veriut./FolDrejt/
