Një shtet i vogël si Hungaria kur po bën politikë botërore bie në kundërthënie, është titulli i prestigjiozes zvicerane “Neue Zürcher Zeitung”, e cila tregon një rezyme të ngjarjave ballkanike duke u ndaluar kryesisht te Maqedonia.
Hungaria po bën deklarata potente, pranon të dënuar politik si Nikola Gruevski dhe e gjithë kjo për të shtuar peshën te vendet e Europës lindore. Qeveria populliste e Hungarisë, e kryesuar nga Victor Orban ka mbështetje të fuqishme nga diaspora hungareze, mediat e kontrolluara si dhe mban kontakte të ngushta me Rusinë.
“Ky vetëbesim i një shteti të vogël si Hungaria, po strehon edhe ish kryeministrin e korruptuar dhe diskredituar maqedonas Nikola Gruevski. Politika e jashtme plot kundërthënie e Hungarisë, i dha strehim një anti-sorosisti si Gruevski, por në të njëjtën kohë Budapeshti është kundër zgjerimit të mëtejshëm të BE,” përcjell foldrejt.com shkrimin e medias zvicerane duke shtuar që Budapeshti mbështet financiarisht media të huaja si në Maqedoni, Slloveni, Ukrainë dhe Rumani për propagandë anti-liberale.
“Manovrimi i Budapeshtit në Maqedoni, duke strehuar Gruevskin dhe financuar media, mund të ketë sukses nesër. Qeveria e SDSM nuk arriti të kënaq popullin e saj me Marrëveshjen e Prespës. Është e mundur, që kjo qeveri të bie. Atëherë do vijnë në pushtet nacionalistët, të cilët do i jenë falenderues Orbanit për mbështetjen,” përcjell foldrejt.com.
Kjo politikë anti-europiane dhe e rrezikshme e Hungarisë vjen si rezultat i mos interesimit të shteteve të mëdha europiane në këtë pjesë të gadishullit ballkanik./Foldrejt.com
