Universiteti “Hasan Prishtina”, ka nderuar profesorin e Fakultetit të Shkencave Matematike Natyrore, në Departamentin e Biologjisë, z. Halil Ibrahimi, shkruan Fol Drejt.
Falë punës kërkimore të tij, Universiteti i Prishtinës dhe Republika e Kosovës, është bërë pjesë e lajmeve në mediat më të njohura botërore.
Dr. Ibrahimi ka zbuluar disa lloje të reja të insekteve, unike për faunën ballkanike dhe më gjerë, ndërsa publikimet e tij shkencore janë shndërruar në referenca për shkencën e biologjisë.
Së fundi në Bjeshkët e Sharrit, ai ka zbuluar llojin “Potamophylax humoinsapiens”.
“Studentët e këtij drejtimi ose kësaj fushe keni arsye që të ndiheni krenar me rezultatin e profesorit tuj” – ka thënë ndër të tjera rektori Prof. dr. Qerim Qerimi.
Ai ia ka ndarë një mirënjohje të cilën e ka cilësuar si diçka modeste, karshi punës që tij kërkimore disavjeçare.
Pas ndarjes së mirënjohjes, profesor Ibrahimi ka mbajtur një ligjëratë të shkurtër, rreth rëndësisë së studimit dhe zbulimit të insekteve të reja.
Sipas tij, ato kontribuojnë në ruajtjen e ambientit, në pastrimin e ujërave dhe shumë aspekteve të tjera.
“Kosova është vatër e biodivirsitetit” – ka thënë ndër të tjera ai, duke u mbështetur në faktet e reja.
Ua kujtojmë se për zbulimet e tij kanë shkruar mediat prestigjioze ndërkombëtare./FolDrejt/
