Të premten që iku, më 20 janar 2023, Akademia e Shkencave dhe e Arteve e Kosovës (AShAK), ka qenë nikoqire me rastin e promovimit të “Fjalorit Serbisht – Shqip”, i autorit Rexhep Zllatku, shkruan Fol Drejt.
Siç u tha me këtë rast, ky fjalor është rezultat i një pune pesëmbëdhjetëvjeçare.
“Si në të kaluarën e jetës sime, tani kaq më shumë më përforcohej bindja se problemi ynë kryesor karshi shqipes nuk është fondi i fjalëve, as drejtshkrimi i saj, por natyra e gjuhës, formulimi ynë i mendimit në natyrën e saj, i cili, shpeshherë është shatra-patra e gjysma-gjysma, nën ndikimin e natyrës së gjuhës serbe”, ka thënë Zllatku me këtë rast.
Kryeredaktori i Logos-A Husamedin Abazi, në anën tjetër, është shprehur i lumtur që shtëpia botuese që ai e drejton, ka pasur rastin që të bashkëpunojë më një autor sikundër që është Zllatku.
“Ne, si shtëpi botuese dhe strofull që rreth vetes ka mbledhur njerëz që çmendurisht e dashurojnë librin dhe faniten në nxjerrjen dhe sjelljen e tij gjer te dora, syri dhe mendja e lexuesit, kemi synuar që përmes këtij angazhimi dhe vetëmohimi, përmes përzgjedhjes dhe botimit të librave të mbjellim fidanë urtësie dhe diturie”, ka thënë ai.
Promovimi në Prishtinë ndodhi pas atij në Shkup, i cili u organizua fundvitin që iku./FolDrejt/
