Qytetarët të zhgënjyer nga mosvotimi i Trustit

Dje gjatë ditës është përcjell me shumë interes seanca parlamentare ku në rend dite ishte Projektligji për Trustin, shkruan Fol Drejt.

Deri në mbrëmje u diskutua rreth çështjes, nëse duhet të kalonte në lexim të parë apo jo, Projektligji që parashihte tërheqjen e 30% të mjeteve nga Trusti.

Nga 101 deputetë sa ishin në sallë, vetëm 97 prej tyre votuan. Prej tyre, PRO votuan 42 deputetë, ndërsa 55 KUNDËR.

Ata të cilët e penguan kalimin e këtij projektligji, qenë kryesisht deputetë të shumicës parlamentare, përkatësisht Lëvizjes Vetëvendosje!

Në rrjete sociale, pas përfundimit të seancës, kanë shpërthyer kritikat dhe pakënaqësitë e qytetarëve të cilët kishin shpresuar se ky projektligj do të kalonte.

“Kërkesa e 17 mijë qytetarëve për tërheqjen e Trustit tregon për gjendjen e rëndë ekonomike. Çmimet e larta, rrogat e vogla e varfëria sot janë problemet kryesore në Kosovë. Sa e dhimbshme me pa një popull duke shpresu në paret e Trustit për me mbijetu në këtë kohë krize” – e ka komentuar situatën gazetari Mirlind Behluli.

Për deputetin e opozitës Besnik Tahiri, vendimi i mbrëmshëm ishte keqpërdorim i skajshëm i besimit të qytetarëve:

“Përmes kësaj video dua t’ia dërgoj kryeministrit Kurti një porosi, i cili me vendimin e tij, me urdhër të tij, sot vendosi që mos të kalojë Trusti.

Qindra dhe mijëra familje, sot, prisnin një vendim të drejtë nga Kuvendi i Kosovës, një vendim i cili u iniciua nga vet qytetarët, nga ata të cilët e votuan.

Besimi i 50% të qytetarëve të Kosovës u keqpërdor skajshmërisht sot!”

Përkundër shpresës që kishte në deputetët, se ky vendim do të merrej në favor të tyre, disa njohës të zhvillimeve ekonomike thanë se, megjithatë, vendimi ishte i drejtë. Sipas një analize të bërë nga Instituti GAP, rikuperimi i mjeteve të tërhequra nga ky fond pensional do të merrte 8 vite kohë.

“Nga analizat e vitit 2020 dhe atij 2022 të Institutit GAP rreth ndikimit të tërheqjes eventuale të kursimeve pensionale, në rast të aprovimit të kësaj iniciative del se:

1. Trusti do të shpërndajë rreth 594 milionë euro, apo afër çerekun e mjeteve që ka nën menaxhim;
2. 695,523 kontributdhënës do të mund të tërhiqnin kursimet e tyre;
3. Rreth 49% e kontributdhënësve do të mund të tërhiqnin mesatarisht nga 96.5 euro;
4. Rreth 90.4% e të gjithë kontributdhënësve do të mund të tërheqin shumicën e fondit prej 594 milionë euro (rreth 58% apo 345.8 milionë euro);
5. Rikuperimi i mjeteve do të merrte 8 vite kohë, si dhe shterrja e kursimeve pensionale në moshën e pensionimit do të shkurtohej për 2.2 vite;
6. Injektimi i 594 milionë eurove në treg do të rëndonte edhe më tej situatën me çmime;
7. Rënia në tregjet ndërkombëtare ka bërë që të bie edhe çmimi për njësi i aksioneve të Trustit.”

Megjithatë, përkundër rrezikut të cilin e paralajmëronin ekspertët e ekonomisë (në rast se do të ndodhte votimi i projektligjit), pakënaqësia e qytetarëve për mos-kalim në lexim të parë, ishte shumë e madhe.

“Kërkesën e qytetarëve për tërheqjen e parave nga TRUSTI, e morëm për obligim dhe e sollëm në Kuvend. Atë e ktheu mbrapsht për të dytën herë me radhë, Lëvizja Vetëvendosje dhe Albin Kurti. Në mes gjendjes së rënduar sociale të popullit dhe pushtetarit Albin Kurti, nuk ekziston më asnjë lidhje mirëkuptimi e konsiderate. Atë e shkëputën përfundimisht me votë, deputetët e Albin Kurtit nga Lëvizja Vetëvendosje” – komentoi Abelard Tahiri nga Partia Demokratike e Kosovës (PDK).

Tahiri nuk ishte i vetmi deputet opozitar që e shfrytëzoi rastin ta kritikonte mazhorancën, listës së tij iu shtuan edhe deputetët nga partitë e tjera. Driton Selmanaj nga Lidhja Demokratike e Kosovës (LDK), në një reagim në llogarinë e tij në Facebook shkroi ndër të tjera “Qeveri kundër popullit të vet!”

Në valën e reagimeve të shumta, nuk mbeti i pavërejtur lajmi se Komisioni Qendror i Zgjedhjeve (KQZ), në mbledhjen e djeshme, “mori vendim për caktimin e lartësisë së mjeteve nga fondi për mbështetjen e subjekteve politike për periudhën 1 janar – 31 dhjetor 2023”, me ç’rast, Lëvizja Vetëvendosje përfitoi hiq më pak se 1.827.000.00 euro. Si rrjedhojë, shumë qytetarë u revoltuan me zmbrapsjen për herë të dytë të këtij projektligji, duke u shprehur të zhgënjyer me vendimin e mazhorancës.

Qytetarët po përballen me një situatë të rënduar ekonomike, me një inflacion të lartë dhe me paga të pandryshuara prej kohësh, në të dy sektorët./FolDrejt/