Media austriake “Der Standard” ka zbuluar një detaj kur thotë se dy presidentët Hashim Thaçi dhe Aleksandër Vucic me gjasë janë pajtuar rreth marrëveshjes së ndarjes së kufijve.
“Pas kësaj “marrëveshje” qëndrojnë amerikanët, por edhe disa europianë”, përcjell foldrejt.com, shkrimin e gazetës austriake. Një ndër kontaktet më të rëndësishme është ish ambasadori amerikan në Serbi, Cameron Phelps Munter, presidenti i East-West-Instituts në Beograd, i cili ka përpunuar idenë e kufijve. Por gjithashtu edhe djali i George Soros, Alex Soros, ka lobuar prej kohësh për këtë ide.”
Ish diplomati austriak Wolfgang Petritsch, i cili punon në institutit austriak Wiener Anwaltskanzlei Lansky, Ganzger & Partner (LGP), nga ku punon edhe si këshilltar i presidentit Aleksandër Vucic, është pjesë e mbështetësve të ndarjes së Kosovës. Në pyetjen e “Standard”, sesa para i dhuron qeveria serbe institutit LGP, Gabriel Lansky përgjigjet:“Se sa hapur ju mund të pyetni, përgjigja e saj ndodhet në detajet e kontratave që unë nuk mund ti publikoj.”
Petritsch punon prej 2014 si këshilltar (“Of Counsel”) dhe anëtar i Senior Expert Council në zyrë. Interesi i LGP qëndron aty, “që ne si zyrë ndërkombëtare ekonomike përfaqësojmë shumë klientë nga Ballkani Perëndimor, por këshillojmë edhe përfaqësues nga BE që kanë interes biznesi në Ballkan.”
Merkel kundër ndarjes
Më tej media austriake tregon sesi nga të gjitha liderët e BE-së, vetëm Angela Merkel ka dalur hapur kundër çfarë do lloj ndryshimi të kufijve në Ballkan. Kurse sa i takon Austrisë, kancelari Sebastian Kurz e mbështet idenë, kurse ministria e jashtme ku ndodhen edhe shumica e ekspertëve, janë shprehur më se skeptikë rreth kësaj ideje. Një rol të rëndësishëm në Austri ka luajtur politologu serb Ivan Vejvoda, i cili ka kontakte të mira në SHBA dhe është pjesë e elitës serbe që punon në Vjenë në intitutin IWM. Ideja e shkëmbimit të territoreve për herë të parë është prezantuar në forumin Alpbach në gusht, ku solli reagime të fuqishme mbi Ballkanin – për shkak të frikës së domino efektit në Bosnjë dhe Maqedoni. Gjithashtu ideja e Serbisë së madhe që filloi me ndryshimin e kufijve solli në vitet 90-të mbi 100 mijë të vdekur, pastrime etnike dhe dhunë masive. Kur jemi te shtetet, Franca është pro ndarjes.
Qeveria serbe nuk ka dashur të jap përgjigje sesa para ka shpenzuar për këshilltarët që të krijojnë klimë të favorshme për ndarjen e Kosovës në Komunitetin Ndërkombëtar. Tashmë është publike që Tony Blair, ka lobuar poashtu për ndarjen e Kosovës.
Një partner në Tiranë
Kur vjen çështja te shkëmbimi i territoreve Serbia ka gjetur një mbështetës në Tiranë dhe ai është kryeministri Edi Rama, shkruan më tej “Der Standard”. Shefja e Komitetit të Helsinkit për të Drejtat e Njeriut në Serbi, Sonja Biserko, rreth kësaj çështjeje mendon: Në fakt Beogradi ka kërkuar një partner në Tiranë dhe në fund e ka gjetur këtë person: ai është vetë kryeministri Edi Rama. Para dy vjetësh, kur Rama ishte i ftuar në Nish, filluan idenë e ndarjes, por atëherë e kundërshtonte Londra dhe Uashingtoni.”
Por plani i ndarjes veçmë lindi në Beograd.
“Ai çdoherë ka qenë në qarkullim, ose hapur, ose i fshehur,” vijon më tej Biserko.
Në fakt Rama flet shpesh sinjalë për krijimin e një Shqipërie të madhe. Ai bile kërkon që të zhbëjë kufirin mes Kosovës dhe Shqipërisë dhe të zgjedh një president për të dyja shtetet. Vucic bën fjalë vetëm për “kufi vetëm me shqiptarët”, pra për të krijuar një territor unik serb. Ndonjëherë politika e dy të ashtuquajturve udhëheqës të Ballkanit me Kosovës është krahasuar me presidentët e mëparshëm të Kroacisë dhe Serbisë, Franjo Tuxhman dhe Slobodan Miloshevic, kundrejt Bosnjës dhe Herceovinës. Tuxhman dhe Miloshevic kërkonin të ndanin mes veti shtetet qendrore ballkanike.
Mosrespektimi i Kushtetutës
Në fund media austriake tregon se ndarja e Kosovës do ishte thyerje e Kushtetuës së Ahtisarit, që ndalon bashkimin ose ndryshimin e kufijve të saj. Por kjo ide mori hov edhe pas fitimit të Donald Trump në krye të SHBA, që ka ulur rolin e ndikimit amerikan mbi Ballkanin. Më parë kjo as që mund të diskutohej.
“Disa banorë në rajon frikësohen që eskalimi i konfliktit mes Kosovës dhe Serbisë është skenar, që në shkurt të arrihet një marrëveshje e madhe Paqeje – ndarja e Kosovës, që atëkohë të portretizohet si zgjidhja më e nevojshme,” përcjell foldrejt.com.
50 shoqata jo-qeveritare i kanë shkruar Federica Mogherini kundër idesë së ndarjes. Bëhet fjalë se kjo nuk mund të gjen konsensus mes Kosovës dhe Serbisë – në Kosovë shumica e politikanëve janë kundër, përveç Thaçit./Foldrejt.com
