Prej disa javësh kryeministri Edi Rama ka bërë të ditur se do pastrojë “kazanin mediatik”, që sipas tij shpërndan lajme të rrejshme dhe pa asnjë burim informacioni.
Në konferencën “News Agencies vs Fake News”, Rama, dikur vetë një ndër gazetarët më të zëshëm, bëri të ditur hapat e radhës kundër lajmeve të rrejshme.
“Bordi i këtij autoriteti duhet të reagojë në mënyrë të menjëhershme, pasi në Shqipëri kanë qarkulluar dhe qarkullojnë lajme të rreme. Ka pasur “Fake News” se kam bërë marrëveshje me Putinin. Por qeveria është gati për të paraqitur paketën anti-shpifje, edhe pse kemi pasur një legjislacion të relaksuar. 5 vitet e fundit u regjistruan 20 mijë portale. Rreth 700 portale janë lajmesh”, tha ish gazetari Edi Rama, duke shtuar se po përgatiten edhe gjoba ndaj këtyre portaleve.
“Paketa anti-shpifje përfshin gjoba për lajmet e rreme dhe shpifjet. Më shumë se 600 portale online janë të paligjshme nga ana tjetër. Vendosja e një loje rregullash të qartë do të jetë në funksion të situatës dhe në përmirësimin e vetë botës së mediave online, sigurisht pa cenuar lirinë themelore të fjalës së lirë dhe të informimit të publikut”, – vijoi Rama.
Në fakt lajmet e rrejshme janë një shqetësim amerikano-europian, që shpesh akuzojnë Rusinë për shpërndarjen e tyre veçanërisht gjatë kohës së zgjedhjeve./Foldrejt.com
