Ish kryeminsitri, Nikola Gruevski, njëherësh personi më i fuqishëm përgjatë viteve 2006-2017 në Maqedoni duhet të paraqitet pranë burgut të Shutkës në Shkup, shkruan foldrejt.com.
“Gjykata Penale informon se Këshilli gjyqësor i Sektorit për krim të organizuar dhe korrupsion, duke vepruar në bazë të ankesës së palës mbrojtëse të të akuzuarit në lëndën me numër 59/17, të ashtuquajtur ‘Tanku’, sot vendosi të hedh poshtë ankesën për shtyrje të dënimit me burg”, njoftoi Gjykata.
Sipas informatave të Gjykatës, vendimi u është dorëzuar palëve. Vendimi do hyjë në fuqi menjëherë kur Gruevski ta pranojë atë që më pas të paraqitet për të vuajtur dënimin në burgun e Shutkës. Nëse ai nuk e pranon vendimin, policia ka të drejtë ta arrestojë dhe ta dërgojë në burg.
Paraprakisht, kërkesa e Gjykatës për marrjen e mandatit të deputetit Nikolla Gruevski nuk u miratua sot në seancë plenare në Kuvendin e Maqedonisë.
Këshilli Penal i Gjykatës së Shkupit ka hedhur poshtë të gjitha ankesat e bërë nga Nikolla Gruevski, për vendimin e lëshuar më herët ku ai dënohej me dy vite burg. Gruevski u dënua për keqpërdorim të parasë publike. Ai kishte blerë një makinë të tipit ‘Mercedes’, në vlerë prej 550 mijë euro.
