“Arti dhe revolta nuk do të vdesin, përveçse me njeriun e fundit!”
Dostojevski
Revolta është kulmi i reaksionit shoqëror. Ajo është një gacë përherë e ndezur që mund të mbulohet me hirin e qetësisë, por kur budallenjtë i fryjnë këtij hiri, kush është ai që guxon ta paramendoj se çfarë do të ndodh?
Nga Imer Topanica
Ndër gabimet e përsëritura nga pushtetarët aktualë dhe eksponentët e tyre është edhe ky: kur provojnë të na e rrëmojnë kujtesën kolektive me “fotografitë” e qeverisjeve të kaluara, ndërsa i shoqërojnë me frazën: sa shpejt harruat! Kujt duan të ia kujtojnë të kaluarën? Neve që e bëmë njërin prej akteve më të pashembullta në tërë historinë e demokracisë së Ballkanit Perëndimor, duke e kthyer tërësisht përmbys skenën politike dhe duke ua besuar pushtetin, të cilin janë duke e shpërdoruar.
E vetmja arsye pse rrugët dhe sheshet e Kosovës nuk kumbojnë nga zërat protestues kundër kësaj qeverie, është se qytetarët janë të ndërgjegjshëm për kontekstin e krijuar me Serbinë. Ata e dinë që në këto momente të ndjeshme, skena politike vendore, të gjithë faktorët relevantë, bashkë me qytetarët, duhet të sinkronizohen në kuptimin e qëndrimeve.
Por politikani ynë, i zvetënuar nëpër zyra, i akomoduar në ambiente komfore, me pagë shpesh trefish më të lartë se sa një qytetar që mezi ia del t’i mbyll llogaritë e borxheve të përmuajshme, e ka shkëputur lidhjen me realitetin. Paraardhësit e tij i patën shkëputë kësisoj lidhjet dhe përdornin “fotografitë” e ish regjimit për të na e kujtuar se sa keq ishim, në kohën e ish regjimit. Me një fjalë, sintaksa e diskursit mbrojtës që kultivohet nga këta të tanishmit, nuk ka ndryshuar shumë nga ajo që e përdornin ata që ishin para tyre.
Pakënaqësitë të cilat shpërthyen në rrjetet sociale me rastin e shtrenjtimit të faturave të tatimit mbi pronë, i përgjigjen shpjegimit të mësipërm. Po qe se Kosova do të ndodhej në rrethana të tjera, po qe se nuk do të ekzistonte problemi me Serbinë, kush do t’i frenonte qytetarët e pakënaqur me këtë lloj trajtimi që iu bëhet nga qeveria?
Sipas data bazës worlddata.info, që nga viti 2008 e deri më sot, inflacioni në Kosovë është ngritur për 39.5%, çka flet për një shtrenjtim enorm të çmimit të produkteve. Vetëm në vitet e fundit, sipas kësaj databaze, inflacioni në Kosovë ka shënuar rritje për 7%. Me fjalë të tjera, 1000 eurot e vitit 2008, sot janë të barabarta me 1395.46 euro.
Ndonëse me shifra dukshëm më të zbutura, rritjen e inflacionit e konstaton edhe Agjencia e Statistikave e Kosovës (ASK):
“Inflacioni mujor i matur nga indeksi i harmonizuar i çmimeve të konsumit ishte 0.9% në muajin dhjetor 2022.
Indeksi i tërësishëm i harmonizuar i çmimeve të konsumit është më i lartë në një mesatare prej 0.9% në muajin dhjetor 2022, krahasuar me muajin nëntor 2022. Kjo kryesisht është shpjeguar me ngritjen e çmimeve të konsumit te nëngrupet e COICOP-it: shërbime për transport (15.9%); energji elektrike (7.6%); veshje (4.2%); blerje të automjeteve (4.0%); qumësht, djathë dhe vezë (2.5%); perime (2.3%); duhan (1.7%); mobile dhe orendi, qilima dhe mbulesa të tjera dyshemeje (1.3%); ujë mineral, pije joalkoolike, lëngje nga pemët dhe perimet (1.2%); me një ndikim të përbashkët të këtyre nëngrupeve prej 1.4% në IHÇK.
Ndërsa, rënie e çmimeve vërehet te nëngrupi e COICOP-it: karburante dhe lubrifikantë për pajisjet personale të transportit (-8.3%), me ndikim prej (-0.5 për qind) në IHÇK.
Norma vjetore e inflacionit e matur në muajin dhjetor 2022 me muajin dhjetor 2021 ishte 12.1%.”
Pikërisht, ndërsa kriza ekonomike e karakterizuar me këtë inflacion të lartë ua ka vështirësuar jetët qytetarëve, shtrenjtimi i taksave nga një qeveri që nuk ia del as të krijojë kushte as për një fabrikë të keçapit, është një fyerje për qytetarët. Përveç nëse qeveria po e provokon revoltën, shpërthimin e pakënaqësisë dhe protestave, për të dhënë dorëheqje. Nënshkrimi i marrëveshjes për “zajednicën”, sado kudo, do t’i kishte shpërlarë nga mëkati./FolDrejt/
