Sot rrjetet sociale janë vërshuar nga reagimet e shumta, pas raportimeve se vlera e faturës së tatimit në pronë, është rritur për 100%. Ministria e Financave (MF), ua ka hedhur fajin komunave, ndërsa këto të fundit ministrisë, shkruan Fol Drejt.
Vendimi në fjalë ka përplasur pushtetet e dy niveleve: atij qendror të përfaqësuar nga MF dhe atij lokal, të përfaqësuar nga Asociacionit të Komunave të Kosovë (AKK).
Këtë përplasje nuk ka hezituar ta shfrytëzojë dhe opozita, e cila ka bërë thirrje për ulje të menjëhershme të faturave.
Në një reagim të MF-së, faji hidhet te komunat:
“Ministria e Financave, Punës dhe Transfereve njofton qytetarët se tatimi në pronë është tatim i cili mblidhet nga komunat dhe përbën njërin nga burimet kryesore të të hyrave vetanake për komunat.
MFPT, bazuar në Ligjin për Tatim në Pronë, obligohet që në baza të rregullta të bëjë vlerësimin e pronave të paluajtshme, ndërsa shkallën e tatimit e përcaktojnë vetë komunat.
Departamenti i Tatimit në Pronë, në kuadër të MFPT, përgjatë vitit 2022 ka kryer vlerësimin e përgjithshëm të tokave dhe objekteve rezidenciale, si dhe ka përpiluar raporte të vlerësimit për prona rezidenciale më datë 31.10.2022, për të cilat janë njoftuar të gjitha Komunat.
Përgjatë vlerësimit të pronave rezidenciale, Departamenti i Tatimit në Pronë ka bashkëpunuar ngushtë me komunat për të përcaktuar çmimin për m2 për objekte dhe toka.”
Por AKK në anën tjetër fajëson MF-në:
“Komunat nuk e kanë ngritur normën tatimore por është bërë rivlerësimi i pronave nga Departamenti përkatës i Ministrisë së Financave dhe Transfereve dhe me këtë rast është rritur vlera e pronave bazuar edhe në çmimet e tregut. Pra, çmimi i faturës së tatimit në pronë llogaritet me shumëzimin e vlerës së pronës me normën tatimore. Kështu, me rritjen e çmimit të pronave (pa u rritur fare norma tatimore nga komunat) është rritur automatikisht vlera e faturës së Tatimit në Pronë”, theksohet në reagimin e AKK-së.
Në një reagim të Komunës së Prishtinës, po ashtu fajësohet ministria, duke thënë se për shkak të rivlerësimit të pronave, ka ardhur si rrjedhojë ngritja e çmimeve të tatimit në pronë:
“Gjatë ditëve të fundit kemi pranuar shumë reagime rreth ngritjes së çmimeve të Tatimit në Pronë, e cila i është atribuuar Komunës së Prishtinës. E kuptojmë plotësisht shqetësimin tuaj, por me qëllim të informimit të drejtë të qytetarëve rreth këtij procesi, ju informojmë se autoriteti kompetent për zbatimin e procedurës së vlerësimit është Ministria e Financave e cila përcakton zonat e vlerave, nivelet e vlerave dhe vlerën e vlerësuar të pronave të paluajtshme që janë brenda territorit të komunave”, thekson komuna.
Ndërkohë qytetarët kanë bërë thirrje që këto përplasje të lihen mënjanë, duke kërkuar që çmimet e tatimit mbi pronën të ulen menjëherë.
Në një kohë krize kaq të madhe, me inflacionin enorm, sipas tyre, ngritja e tatimeve është e pafalshme dhe e padurueshme./FolDrejt/
