Rusia dhe Turqia po ndërtojnë Rrjedhën Turke (Turkish Stream), një projekt që do sjell gazin rus nga Rusia drejt në qendër të Europës. Sipas mediave gjermanofone, pas planit të presidentit Vladimir Putin është që Rrjedha Turke të përfundojë në Austri.
Fillimisht, në 2014, Rusia tentoi të krijojë Rrjedhën Jugore (South Stream) që do fillonte nga Rusia, përmes Detit të Zi në Bullgari. Megjithatë komisioneri i atëhershëm i energjitikës në BE, Günther Oettinger, ishte i prerë dhe e kundërshtoi këtë projekt për anëtarët e BE. Këtu përfitoi Turqia, presidenti i së cilës nuk është se dëgjonte urdhrat e BE – Rexhep Taip Erdogan.
“Der Spiegel” tash thekson se përmes Turkish Stream Rusia po përpiqet të ndikojë në Ballkan.
“Kjo është ofansiva e dytë ruse në Ballkan. Pasi dështoi me rrjedhën e parë, Rrjedha Turke do kalojë nga Turqia, përmes Bullgarisë, Serbië dhe Hungarisë deri në Austri. Kjo është ideja që nuk reshti së ekzistuari në mendjen e Putinit. Hungaria është e vendosur për të mbështetur idenë, kurse Serbia nënshkroi me Rusinë një memorandum në janar,” përcjell foldrejt.com. Kjo nuk ka vetëm relevancë ekonomikë për Rusinë, por edhe lidhje dhe kontrollim për partnerët e saj shekullorë sllavë: bullgarët dhe serbët.
Një ndër shkaqet se pse Nikola Gruevski u kthye i padëshirueshëm te Perëndimi, ishte se mbështeste Rrjedhën Turke që të kalojë përmes Maqedonisë, kurse socialdemokrati Zoran Zaev ishte katërcipërisht kundër, do shkruante pak kohë më parë austriakja “Der Standard”.
Çfarë roli luan Turqia?
Turqia nuk e ka frikën se përmes gazit rus do jetë i varur nga Moska, pasi pozita e mirë gjeo-strategjike ia mundëson që të marrë lehtë edhe gazin dhe naftën nga Irani, Alzhiri, Nigeria dhe shtetet vëlla Katari dhe Azerbejxhani. Gjithashtu, kërkesat turke për energjitikë janë shtuar dyfish nga dhjetë vjet më parë.
Për këtë Rrjedha Turke ka rëndësi për Turqinë si shtet, pasi përveç që i plotëson nevojat e saj, ajo kthehet edhe në faktorin jetik për furnizimin me gaz në Europë.
Çfarë do të thotë për vendin e deritashën transit, Ukrainën?
80 miliardë kubik metër gaz i Rusisë kanë kaluar përmes Ukrainës për të furnizuar Europën. Me projekte si Rrjedha Turke dhe Rrjedha Veriore 2 ( Nord Stream 2 ), praktikisht Ukraina del nga loja. Kjo edhe për shkak të marrëdhënieve të tensionuara mes të dyja vendeve pas aneksimit të Krimesë.
Ukraina përfiton dy miliardë euro duke qenë vetëm vend transit. Gjermania po mundohet të bind Rusinë që një pjesë të gazit ta dërgojë përsëri përmes Ukrainës, ku Moska edhe i ka premtuar. Por ky premtim është pak i zbatueshëm.
“Qëllimi kryesor i Rrjedhës Turke,” thotë ekspertia energjitike e Moskës, Belova padyshim “është minimizimi i gazit transit përmes Ukrainës.”/Foldrejt.com
